PSG po përgatitet të rrisë ofertën për Zion Suzukin, një zhvillim që e vendos Juventusin përballë rrezikut për të humbur portierin e Parmas, të paktën në mënyrë direkte.
Sipas “Tuttomercatoweb”, duke iu referuar “Sky Sport”, Parma kishte refuzuar ofertën fillestare të PSG-së prej 28 milionë eurosh plus 5 milionë euro bonuse, por nuk pritet ta refuzojë ofertën e përmirësuar që kampionët e Francës kanë në plan të bëjnë.
Nasser Al-Khelaïfi thuhet se është gati të vendosë në tavolinë rreth 35 milionë euro, përfshirë bonuset, ndërsa kontakte të reja mes dy klubeve priten në fillim të javës së ardhshme. PSG është optimist se do të arrijë marrëveshje për japonezin, i cili tashmë e ka bërë të qartë se do ta pranonte me kënaqësi transferimin, që do të përbënte një hap të rëndësishëm përpara në karrierën e tij.
Për Juventusin, ky lajm është një thikë me dy presa. Suzuki kishte qenë objektivi i preferuar i Luciano Spallettit për portën, por me lojtarin që pritet të transferohet në Paris dhe jo në Torino, e vetmja rrugë realiste që “Zonja e Vjetër” ka për ta siguruar tani kalon përmes PSG-së.
Siç është raportuar gjatë gjithë kësaj sage, Juventusi po mbështetet te shpresa për një huazim të drejtpërdrejtë nëse japonezi përfundon transferimin te PSG. Një skenar i tillë do t’i përshtatej edhe vetë lojtarit, i cili nuk është plotësisht i bindur për të qenë menjëherë pjesë e skuadrës së parë në kryeqytetin francez.