Cristian Romero do të ishte “i hapur” ndaj një transferimi kontrovers nga Tottenham Hotspur te Arsenali gjatë merkatos së verës, sipas raportimeve. Mbrojtësi 28-vjeçar pritet të largohet nga Spurs këtë verë dhe raportohet se nuk do ta kishte problem një lëvizje të bujshme që do të shkaktonte tensione në të gjithë veriun e Londrës.
Sipas “The Sun”, Arsenali do të ishte i interesuar për një marrëveshje kontroverse për mbrojtësin argjentinas, megjithëse raportimi thekson se Tottenham nuk ka absolutisht asnjë interes për ta lejuar një transferim të tillë.
Në vend të kësaj, një kalim në një klub tjetër evropian duket skenari më i mundshëm, me Atletico Madridin dhe Interin që gjithashtu raportohet se janë të interesuar për Romero.
Tottenham dëshiron të rindërtojë skuadrën nën drejtimin e trajnerit të ri Roberto De Zerbi këtë verë dhe, megjithëse nuk do ta pengojë largimin e Romeros, klubi është i vendosur të mos e lejojë atë t’i bashkohet rivalit të përbetuar. Mundësia që Romero të transferohej tek Arsenali do të rikthente kujtimet e transferimit kontrovers të ish-mbrojtësit Sol Campbell në vitin 2001.
Campbell ishte lojtari i fundit që kaloi drejtpërdrejt nga Tottenham te Arsenali dhe për këtë arsye tifozët e Tottenhamit në “White Hart Lane” e pagëzuan me nofkën “Judas”. Ai ishte lojtar i lirë pas përfundimit të kontratës me Tottenhamin, ndaj klubi nuk kishte mundësi të ndërhynte në atë transferim.
Ndërkohë, Romero ka kontratë me klubin deri në qershor të vitit 2029 dhe thjesht nuk do të lejohet të transferohet në “Emirates Stadium”. Lojtari i fundit që kaloi mes dy klubeve ishte gjithashtu një mbrojtës qendre, William Gallas, i cili iu bashkua Tottenhamit pas përfundimit të kontratës së tij me Arsenalin në vitin 2010.
Kontrata aktuale e Romeros duket se e përjashton praktikisht mundësinë e një transferimi te Arsenali, ndërsa De Zerbi tashmë po planifikon skuadrën pa argjentinasin. Tottenham ka transferuar Jan Paul van Hecke nga Brighton për 52 milionë paund si zëvendësues të tij dhe dëshiron të rikuperojë një pjesë të shumës së investuar përmes shitjes së finalistit të fundit të Kupës së Botës.
Mësohet se transferimi tek Atletico Madridi është zgjidhja më e mundshme për shkak të interesimit afatgjatë të klubit spanjoll për lojtarin. Trajneri Diego Simeone thuhet se është një admirues i madh i bashkëkombësit të tij.
Atletico Madridi dështoi ta transferonte Romeron një vit më parë, kur ish-trajneri Thomas Frank e bindi mbrojtësin të qëndronte dhe i ofroi një kontratë të re me kushte të përmirësuara, duke i dorëzuar gjithashtu shiritin e kapitenit.
Edhe Interi është i interesuar për të, por raportohet se Atletico Madridi është gati të bëjë një ofertë të re prej 40 milionë paundësh për Romeron dhe beson se mund të arrijë marrëveshje për transferimin e tij.