Një furgon me targa të Maqedonisë së Veriut është përfshirë nga flakët mëngjesin e kësaj të shtune, në afërsi të një pushimi për shoferët në Lushnje. Automjeti po transportonte zogj të vegjël të fushës, të cilët vinin nga Maqedonia e Veriut. Drejtuesi i furgonit ka konstatuar zjarrin vetëm pasi kishte dalë nga autostrada dhe ishte futur në drejtim të Këmishtajt.
Pas njoftimit, zjarrfikësit kanë mbërritur shpejt në vendngjarje dhe kanë ndërhyrë për të shuar flakët, të cilat kishin përfshirë kabinën e drejtuesit. Si pasojë e zjarrit, është dëmtuar një pjesë e konsiderueshme e ngarkesës, ndërsa më shumë se gjysma e zogjve kanë ngordhur.
Sipas shërbimit zjarrfikës të Lushnjës, paraprakisht dyshohet se zjarri është shkaktuar nga një defekt në sistemin e kondicionimit të pjesës së ngarkesës.