Scott McKenna do të mbetet te Dinamo e Zagrebit, pasi transferimi i tij i mundshëm te Rangers është ndërprerë. Gjiganti skocez kishte shqyrtuar mundësinë e rikthimit të mbrojtësit të kombëtares skoceze në vendlindje, por bisedimet nuk shkuan më tej se një interesim fillestar për shkak të kushteve të vendosura nga Dinamo.
Sipas gazetës ‘Scottish Sun, Rangers’ që në fillim të afatit kalimtar ishte interesuar për ta marrë McKennan në huazim. Megjithatë, Dinamo përcaktoi kushte që klubi skocez nuk ishte i gatshëm t’i pranonte, prandaj negociatat u ndërprenë menjëherë. Gazetari Robert Grieve shkroi se shanset për realizimin e këtij transferimi janë shumë të vogla.
“Ka shumë pak gjasa që Rangers ta transferojë reprezentuesin skocez Scott McKenna. Klubi nga Ibrox u interesua për një huazim në fillim të afatit kalimtar, por kushtet e kërkuara e bënë marrëveshjen të pamundur. Do të duhej një kthesë e madhe që ai të bëhej sërish një opsion. Rangers tani po shqyrton lojtarë të tjerë”, shkroi Grieve.
Spekulimet për rikthimin e McKennas në Skoci u shtuan pas lëndimit të mbrojtësit Ben Godfrey, i cili ia kufizoi trajnerit Derek McInnes opsionet në mbrojtje. Megjithatë, Rangers nuk i rifilloi bisedimet me Dinamon, por vendosi të kërkojë përforcime në adresa të tjera. McInnes e njeh mirë McKennan nga koha kur e drejtonte te Aberdeen, prandaj emri i mbrojtësit lidhej shpesh me Rangersin.
Megjithatë, kërkesat financiare të Dinamos u treguan pengesë e pakalueshme. McKenna sezonin e kaluar zhvilloi 42 ndeshje për Dinamon, prej tyre 10 në garat evropiane, duke u shndërruar në një nga lojtarët më të rëndësishëm të mbrojtjes së klubit kroat. Aktualisht, ai është i përqendruar te ndeshjet kualifikuese për Ligën e Kampionëve.
Sipas informacioneve të fundit, Rangers nuk është afër një marrëveshjeje dhe një tentativë e re për transferimin e tij do të ishte e mundur vetëm nëse Dinamo ul ndjeshëm kërkesat financiare ose nëse klubi skocez ndryshon politikën e tij financiare.