Një shtetas me nënshtetësi britanike dhe azere është arrestuar në Qipro, pasi autoritetet britanike e akuzojnë se ka spiunuar bazën ajrore ushtarake të RAF Akrotiri dhe ka ndarë informacione me Gardën Revolucionare Islamike të Iranit (IRGC). 44-vjeçari, i cili jeton në veri të Londrës, u arrestua më 17 korrik me kërkesë të Mbretërisë së Bashkuar dhe aktualisht ndodhet në paraburgim, ndërsa pritet seanca për ekstradimin e tij.
Sipas Policisë Metropolitane të Londrës, ai dyshohet se ka kryer “vëzhgim armiqësor” të bazës ushtarake RAF Akrotiri në periudhën 11 maj – dhe më pas ka përcjellë informacion tek Garda Revolucionare e Iranit.
Prokuroria britanike ka ngritur akuza ndaj tij në bazë të Ligjit për Sigurinë Kombëtare të vitit 2023, për ndihmë ndaj një shërbimi të huaj inteligjent dhe për hyrje apo vëzhgim të një objekti të ndaluar në dëm të interesave të Mbretërisë së Bashkuar, raporton Euronews, transmeton Sinjali.
Ky është rasti i parë kur autoritetet britanike zbatojnë këtë ligj për vepra penale që dyshohet se janë kryer jashtë territorit të Britanisë. Baza RAF Akrotiri, e vendosur pranë Limassolit në Qipro, konsiderohet një nga instalimet më strategjike ushtarake të Mbretërisë së Bashkuar në Mesdheun Lindor.
Rëndësia e saj është rritur edhe më shumë për shkak të konfliktit mes Iranit, Izraelit dhe Shteteve të Bashkuara. Hetimet po zhvillohen në bashkëpunim mes autoriteteve britanike dhe qipriote, ndërsa procedurat e ekstradimit të të dyshuarit janë ende në proces. Sinjali – aty ku e vërteta flet para lajmit!