Familja e një djali 10-vjeçar, i cili u shpëtua nga mbytja në plazhin Seabright në Santa Cruz të Kalifornisë, ka rrëfyer momentet dramatike të incidentit që u filmua dhe u bë viral në rrjetet sociale. Babai i fëmijës, Sumit Rai, tha se reagimi i shpejtë i personave të pranishëm i shpëtoi jetën djalit të tij.
“Edhe dy ose tre sekonda dhe nuk mendoj se djali im do t’ia kishte dalë”, deklaroi ai. Nathaniel, 10 vjeç, ndodhej me pushime në Kaliforni së bashku me nënën dhe motrën e tij më të vogël, kur u rrëmbye nga valët dhe humbi ndjenjat në ujë. Sipas babait të tij, fëmija ishte i vetëdijshëm se po mbytej dhe, pasi u nxor nga uji, ishte shumë i dobët dhe dukej se nuk po merrte frymë.
Në ndihmë të tij ndërhyri roja 16-vjeçare e plazhit, Ryder Williams, së bashku me Aaron Bonnen dhe pushues të tjerë që ndodheshin në vendngjarje. Operacioni i shpëtimit zgjati rreth dy minuta dhe u regjistrua nga një qytetar. Babai i 10-vjeçarit shprehu mirënjohje të thellë ndaj të gjithë personave që morën pjesë në shpëtimin e djalit të tij. “Zoti i bekoftë dhe faleminderit.
Nuk mund ta shpreh mjaftueshëm mirënjohjen time. Nuk ka asgjë më të çmuar për mua sesa fëmijët e mi”, tha ai. Veprimi heroik i 16-vjeçarit ka marrë vlerësim të gjerë në Shtetet e Bashkuara, ndërsa sipas mediave amerikane, ai është ftuar në Shtëpinë e Bardhë për t’u nderuar me një çmim. Sinjali – aty ku e vërteta flet para lajmit!