Ukraina ka deklaruar se një raketë lundruese ruse ka shkelur hapësirën ajrore të NATO-s gjatë sulmit të fundit masiv të Rusisë, duke rritur shqetësimet për sigurinë në rajon.
Ministri i Jashtëm ukrainas, Andrii Sybiha, tha se një raketë e tipit Kh-101 kaloi mbi hapësirën ajrore të Polonisë gjatë natës, duke e cilësuar incidentin si një tjetër dëshmi të nevojës urgjente për forcimin e mbrojtjes ajrore të Ukrainës.
“Ky është një tjetër demonstrim i qartë se forcimi i mbrojtjes ajrore të Ukrainës është urgjent dhe shërben si garanci për mbrojtjen e të gjithë komunitetit euroatlantik, ” deklaroi Sybiha. Sipas tij, gjatë sulmit Rusia lëshoi gjithsej 74 raketa, shumë prej tyre balistike, si dhe qindra dronë ndaj objektivave në Ukrainë.
Ai akuzoi presidentin rus Vladimir Putin se vazhdon të zhvillojë luftë kundër civilëve, përfshirë gra dhe fëmijë. Ndërkohë, autoritetet polake njoftuan se kanë zbuluar një krater dhe një “objekt të paidentifikuar” në rajonin lindor të Lublinit, pranë kufirit me Ukrainën, pa konfirmuar zyrtarisht natyrën e tij apo nëse lidhet me raketën e përmendur nga Kievi.
Deklarata e Ukrainës vjen në një kohë kur Kievi vazhdon t’u kërkojë aleatëve perëndimorë furnizime shtesë me sisteme të mbrojtjes ajrore, duke argumentuar se mbrojtja e hapësirës ajrore ukrainase është njëkohësisht mbrojtje për sigurinë e vendeve të NATO-s.