Të paktën shtatë persona kanë humbur jetën si pasojë e një vale sulmesh ruse me raketa balistike që goditën disa rajone të Ukrainës gjatë së enjtes, ndërsa Polonia aktivizoi avionët luftarakë dhe sistemet e mbrojtjes ajrore për të garantuar sigurinë e hapësirës së saj ajrore. Në Kiev u raportua një viktimë dhe dy persona të lënduar.
Kryetari i kryeqytetit, Vitali Klitschko, bëri të ditur se disa objekte jo-banesore u përfshinë nga zjarri pas shpërthimeve. Bilanci më i rëndë u regjistrua në qytetin Kryvyi Rih, ku sipas autoriteteve lokale një raketë balistike e tipit Iskander-M goditi një ndërtesë banimi, duke lënë gjashtë të vdekur, mes tyre edhe dy fëmijë.
Tetë persona të tjerë mbetën të lënduar, ndërsa ekipet e emergjencës vazhduan operacionet e kërkim-shpëtimit. Në qytetin perëndimor të Lvivit, pranë kufirit me Poloninë, 15 persona u lënduan dhe dy ndërtesa banimi pësuan dëmtime. Shërbimet e shpëtimit po punonin për të nxjerrë persona që dyshohet se kanë mbetur nën rrënoja.
Për shkak të intensitetit të sulmeve, Komanda Operacionale e Forcave të Armatosura të Polonisë njoftoi se ngriti në ajër avionët luftarakë dhe një avion të paralajmërimit të hershëm, ndërsa sistemet tokësore të mbrojtjes ajrore dhe radarët u vendosën në gatishmëri si masë parandaluese.
Sulmet ndodhën pas kthimit të presidentit ukrainas, Volodymyr Zelensky, nga vizita në Shtetet e Bashkuara. Sipas tij, presidenti amerikan Donald Trump ka rënë dakord t’i japë Ukrainës licenca për raketat Patriot. Agjencia Reuters ka bërë të ditur se nuk ka mundur t’i verifikojë në mënyrë të pavarur të gjitha raportimet nga terreni. Sinjali – aty ku e vërteta flet para lajmit!