Parlamenti italian pritet të shqyrtojë një projektligj që synon t’i japë fund përdorimit të karrocave turistike të tërhequra nga kuajt, të njohura si “botticelle”, në qytetet e vendit. Nisma është paraqitur nga partitë opozitare, të cilat kërkojnë ndryshimin e legjislacionit aktual për të ndaluar përdorimin e kafshëve në transportin publik për qëllime turistike, rekreative dhe ceremoniale.
Sipas propozuesve, kufizimet e deritanishme për oraret e punës dhe lëvizjen e karrocave nuk kanë qenë të mjaftueshme për të garantuar mirëqenien e kuajve. Përfaqësues të organizatave për mbrojtjen e kafshëve argumentojnë se temperaturat e larta, asfalti i nxehtë dhe trafiku i dendur në qytetet italiane krijojnë kushte të papërshtatshme për këto kafshë.
Projektligji ka marrë mbështetje edhe nga autoritetet e qytetit të Romës, të cilat kanë nisur një fushatë sensibilizuese për të promovuar alternativa ndaj përdorimit të karrocave me kuaj në zonat turistike. Nëse miratohet, ligji do t’i japë fund një tradite shumëvjeçare në qytetet italiane, duke ndaluar përdorimin e kuajve për transportin turistik në nivel kombëtar.
Sinjali – aty ku e vërteta flet para lajmit!