Erling Haaland nuk ka sjellë vetëm gola dhe vëmendje sportive për Norvegjinë, por duket se ka ndikuar edhe në rritjen e interesimit për ta vizituar vendin. Gjatë Kupës së Botës, sulmuesi norvegjez regjistroi një rritje prej rreth 31.9 milionë ndjekësish të rinj në Instagram , më shumë se çdo futbollist tjetër në turne.
Kjo e bëri Haalandin një nga fytyrat më të mëdha të futbollit në rrjetet sociale, pas Cristiano Ronaldos, Lionel Messit dhe Kylian Mbappesë. Ekspertët thonë se ndikim të madh pati mënyra se si Haaland komunikoi me publikun. Në vend të postimeve të kuruara në mënyrë artificiale, ai ndau momente nga prapaskenat e ekipit, situata të zakonshme dhe një anë më të afërt të personalitetit të tij.
Ky popullaritet online duket se është kthyer edhe në interes konkret për Norvegjinë si destinacion turistik. Kërkimet për vendin janë rritur ndjeshëm pas suksesit të kombëtares. Sipas të dhënave të Google Trends, kërkimet globale për “Norway” janë rritur rreth 300 për qind , ndërsa në Poloni kërkimet për “Norwegia” janë rritur deri në 200 për qind krahasuar me një vit më parë.
Edhe platformat e udhëtimeve kanë regjistruar rritje të interesimit. Kërkimet për fluturime drejt Norvegjisë dhe rezervimet për akomodime kanë shënuar rritje, duke treguar se fama e Haalandit dhe suksesi sportiv po ndikojnë edhe në ekonominë e vendit.
Rasti i Norvegjisë shihet si shembull se si një yll sportiv mund të bëhet ambasador i një shteti, duke e kthyer vëmendjen nga fusha e futbollit në turizëm dhe imazh ndërkombëtar. Sinjali – aty ku e vërteta flet para lajmit!