Një grua 23-vjeçare nga Skocia ka folur publikisht për herë të parë pas rastit që tërhoqi vëmendjen e mediave, ku ajo simuloi një shtatzëni dhe lindje duke përdorur një kukull me pamje realiste. Kira Cousins tha se gjithçka nisi pasi përjetoi një abort spontan, por nuk gjeti forcën t’i tregonte partnerit të saj se shtatzënia kishte përfunduar tragjikisht.
Sipas saj, frika dhe vështirësia për të përballuar situatën e shtynë të ndërtonte një histori të pavërtetë. Ajo kishte përdorur një bark artificial për të krijuar përshtypjen e shtatzënisë dhe më pas kishte blerë një kukull që i ngjante një foshnjeje të porsalindur, duke u thënë familjarëve dhe partnerit se kishte sjellë në jetë një vajzë.
Në deklaratat e saj për mediat britanike, 23-vjeçarja pranoi se veprimet e saj ishin të gabuara, por tha se ato erdhën si pasojë e dhimbjes së humbjes dhe pamundësisë për të përballuar realitetin.
Ajo shtoi se kishte tentuar disa herë t’i tregonte partnerit të vërtetën, por nuk arriti ta bënte, duke theksuar se vetëm ata që kanë kaluar situata të ngjashme mund ta kuptojnë barrën emocionale që përjetoi.
Rasti shkaktoi debat të gjerë në opinionin publik, ndërsa rrëfimi i saj ka rikthyer vëmendjen te ndikimi psikologjik që mund të ketë humbja e një shtatzënie dhe rëndësia e mbështetjes emocionale për personat që përballen me përvoja të tilla. Sinjali – aty ku e vërteta flet para lajmit!