Dy klubet e mëdha angleze, Liverpooli dhe Tottenhami kanë shfaqur interesim për mbrojtësin e majtë të Atletico Madridit, Matteo Ruggeri, pas paraqitjeve të tij të mira në Spanjë. Mbrojtësi italian iu bashkua Atletico Madridit në vitin 2025 nga Atalanta për 17 milionë euro dhe që nga atëherë është shndërruar në një lojtar të rëndësishëm për skuadrën madrilene.
Ruggeri zhvilloi 41 ndeshje në të gjitha kompeticionet sezonin e kaluar, ndërsa kontribuoi edhe me tre asistime në garat evropiane. Ai ishte titullar në të dyja ndeshjet gjysmëfinale të Ligës së Kampionëve ndaj Arsenalit, ku paraqitjet e tij tërhoqën vëmendjen e disa klubeve të mëdha.
Përveç Liverpoolit dhe Tottenhamit, interesim për 23-vjeçarin kanë shfaqur edhe klubet italiane Fiorentina, Interi, Milani dhe Juventusi. Sipas mediave italiane, Liverpooli e ka ndjekur Ruggerin prej disa vitesh dhe më herët kishte bërë kontakte me Atalantën pas triumfit të saj në Ligën e Evropës në vitin 2024.
Megjithatë, Atletico Madridi nuk ka në plan ta lejojë largimin e mbrojtësit këtë verë dhe është i gatshëm të refuzojë çdo ofertë që mund të vijë për shërbimet e tij. Liverpooli dhe Tottenhami mbeten në garë, por klubi spanjoll synon ta mbajë në skuadër një nga lojtarët që konsiderohet pjesë e rëndësishme e projektit të ardhshëm.