Al-Hilali është i gatshëm të shpenzojë një shumë marramendëse për të transferuar Luis Diazin nga Bayern Munichu gjatë afatit kalimtar veror. Sipas raportimeve, klubi saudit e ka vendosur sulmuesin kolumbian në krye të listës së objektivave për këtë verë, pasi tashmë ka siguruar shërbimet e anësorit holandez Crysencio Summerville nga West Ham Unitedi.
Gazetari i besueshëm Sacha Tavolieri raporton se Richard Hughes, drejtori aktual sportiv i Liverpoolit, i cili do të marrë detyrën tek Al-Hilali pas mbylljes së merkatos, po udhëheq negociatat për transferimin e Diazit. Në një postim në llogarinë e tij në platformën “X”, Tavolieri shpjegoi se Al-Hilali ende nuk ka nisur bisedime zyrtare me Bayern Munichun.
Fillimisht, klubi synon të bindë vetë futbollistin që të pranojë transferimin, përpara se të kontaktojë me drejtuesit bavarezë. Për këtë arsye, Al-Hilali është gati t’i ofrojë ish-yllit të Liverpoolit një pagë vjetore prej 25 milionë eurosh për të siguruar miratimin e tij.
Nëse Diazi pranon ofertën, Al-Hilali do të hyjë menjëherë në negociata me Bayern Munichun, duke ofruar një shumë që varion nga 120 deri në 150 milionë dollarë për të finalizuar marrëveshjen. Nëse realizohet, ky do të ishte transferimi më i shtrenjtë në historinë e kampionatit saudit.
Një shifër e tillë do të kalonte rekordin e mëparshëm prej 90 milionë eurosh që Al-Hilali pagoi për Neymarin te Paris Saint-Germain në verën e vitit 2023. Tavolieri shton se Al-Hilali ka rezervuar një buxhet prej 350 milionë dollarësh për përforcime këtë verë, çka tregon se transferimi i Luis Diazit mund të mos jetë lëvizja e fundit e klubit në këtë merkato.
Deri më tani, Al-Hilali ka zyrtarizuar gjashtë afrime gjatë kësaj vere: Crysencio Summerville, Mohammed Al-Owais, Sabri Dahl, Abdullah Al-Anzi, Mohammed Al-Sarnukh dhe Nawaf Al-Habashi.