Pas triumfit në etapën e 18-të me finish në Orcières-Merlette, Richard Carapaz ka bërë një tjetër paraqitje madhështore në male dhe ka siguruar fitoren e dytë të etapës në këtë edicion të “Tour de France”.
Çiklisti ekuadorian i skuadrës EF Education-EasyPost, i ndihmuar edhe nga dy rrëzimet e Sepp Kuss, i cili ishte në krye të garës, triumfoi pas një shkëputjeje të gjatë në etapën e 20-të të “Grande Boucle”, me gjatësi 170.9 kilometra nga Le Bourg d’Oisans deri në Alpe d’Huez. Pas fituesit të ‘Giro d’Italia 2019’ dhe kampionit olimpik në Tokio 2020, vendin e dytë e zuri Remco Evenepoel.
Belgu ishte më i miri ndër favoritët në ngjitje dhe në metrat e fundit kaloi pikërisht Kussin. Ai përfundoi 26 sekonda pas Carapaz, ndërsa pesë sekonda më vonë mbërriti amerikani i Visma-Lease a Bike. Pas paraqitjes së jashtëzakonshme një ditë më parë në etapën e parë me finish në Alpe d’Huez, Tadej Pogaçar këtë herë nuk sulmoi.
Slloveni vendosi të qëndrojë së bashku me shokun e skuadrës, Isaac Del Toro, për ta shoqëruar deri në finish. Dy çiklistët e UAE Team-XRG kaluan vijën e finishit 1 minutë e 5 sekonda pas Carapaz dhe e mbyllën garën të përqafuar, duke bërë edhe gjestin karakteristik me brirë, simbol i festimit të Del Toros.
Meksikani Del Toro, pas vendit të dytë në Giro d’Italia 2025, do ta përfundojë këtë Tour de France në vendin e tretë në renditjen e përgjithshme. Ai u rendit para francezit Paul Seixas, i cili humbi terren në Col de Sarenne, por ruajti vendin e katërt në klasifikimin total.
Çiklisti 19-vjeçar nga Lyoni ka ende 1 minutë e 6 sekonda avantazh ndaj bashkëkombësit Lenny Martinez, i cili është i pesti me 13 minuta e 2 sekonda pas Pogaçar. Nëse nuk ndodh ndonjë befasi e madhe, Seixas do ta mbyllë Tour-in në vendin e katërt, duke humbur podiumin në debutimin e tij, por duke dëshmuar se është një nga talentet më të mëdha të çiklizmit botëror.
Shumë prisnin një tjetër fitore etape – e gjashta në këtë Tour – për Tadej Pogaçarin, por slloveni tashmë e ka vulosur suksesin e tij të pestë në ‘Tour de France’. Në vend të tij, protagonist ishte sërish Carapaz, i cili brenda tri ditësh regjistroi dy fitore etapash dhe siguroi edhe fanellën me pika të kuqe për ngjitjet malore.
Etapa e 20-të ishte një nga më të vështirat e këtij edicioni, me katër ngjitje të famshme: Télégraphe (kategori e parë) – 11.9 km me pjerrësi mesatare 7.1%; Croix de Fer (jashtë kategorie) – 24 km me 5.2%; Galibier (jashtë kategorie) – 17.7 km me 6.9%; Alpe d’Huez përmes Col de Sarenne – 12.8 km me 7.3%.
Në shkëputje ishin disa emra të mëdhenj të çiklizmit botëror: Sepp Kuss, Davide Piganzoli, Jai Hindley, Juan Ayuso, Richard Carapaz dhe Thymen Arensman. Rreth 45 kilometra para finishit mbetën katër në krye: Ayuso, Hindley, Carapaz dhe Kuss – të gjithë fitues të një gare të madhe (Grande Giro), përveç Ayusos. Kuss, i njohur si “The Durango Kid”, sulmoi në 23 kilometrat e fundit.
Ai rezistoi për një kohë të gjatë, por në ngjitjen e Alpe d’Huez u rrëzua dy herë dhe u kap nga Carapaz, i cili më pas ngriti duart në finish. Kjo ishte një ditë e veçantë për Filippo Gannën, i cili festoi ditëlindjen e 30-të. Italiani, me humor, tha për Eurosport: “E vendosa alarmin sa më vonë që të ishte e mundur për të rikuperuar nga dita e djeshme.
Mendoj se sot do të jetë etapa më e vështirë e këtij Tour-i. Shpresoj që grupi i çiklistëve të jetë i madh. Për publikun do të jetë spektakël, ndërsa për mua nuk ka ndonjë detyrë të veçantë. Më thanë: ‘përpiqu të mbijetosh’ , dhe këtë do të bëj”.
Finalja e madhe nesër në Paris Etapa e 21-të dhe e fundit e Tour de France do të vendosë vulën mbi edicionin e 113-të të garës, me finishin tradicional në Champs-Élysées. Për të dytin vit radhazi, organizatorët kanë përfshirë tri kalime në ngjitjen e Montmartre, duke e bërë fundin më të paparashikueshëm.
Megjithatë, për shkak të situatës me zjarret në Francë, etapa është shkurtuar nga 133 në vetëm 89 kilometra. Zjarret kanë detyruar evakuimin e rreth 140 mijë personave. Organizatorët dhe autoritetet e Parisit kanë njoftuar se masat e sigurisë janë shtuar për shkak të emergjencës.
Nisja zyrtare do të bëhet në orën , ndërsa çiklistët do të kryejnë dy xhiro shtesë në Champs-Élysées para se të hyjnë në qarkun e Montmartre, ku pritet edhe finishi i madh. Etapa e 20-të 1. Richard Carapaz (EF Education – Easypost) 04h 59′ 39” – B : 10” – 2. Remco Evenepoel (Red Bull – Bora – Hansgrohe) + 00h 00′ 26”B : 6” 3. Sepp Kuss (Team Visma | Lease A Bike) + 00h 00′ 31”
B : 4”P : 01′ 00 4. Tadej Pogaçar (UAE Team Emirates XRG) + 00h 01′ 05′ 5. Isaac Del Toro (UAE Team Emirates XRG) + 00h 01′ 05 6. Lenny Martinez (Bahrain Victorious) + 00h 01′ 07 7. Jai Hindley (Red Bull – Bora – Hansgrohe) + 00h 02′ 15 8. Mattias Skjelmose (LIDL-TREK) + 00h 02′ 55 9. Juan Ayuso (LIDL-TREK) + 00h 02′ 55 10.
Paul Seixas (Decathlon CMA CGM Team) + 00h 02′ 55 Renditja përgjithshme 1. Tadej Pogaçar (UAE Team Emirates XRG) 72h 53′ 44 2. Remco Evenepoel (Red Bull – Bora – Hansgrohe) + 00h 06′ 26 3. Isaac Del Toro (UAE Team Emirates XRG) + 00h 09′ 42 4. Paul Seixas (Decathlon CMA CGM Team) + 00h 11′ 56 5. Lenny Martinez (Bahrain Victorious) + 00h 13′ 02 6.
Mattias Skjelmose (LIDL-TREK) + 00h 14′ 59” 7. Juan Ayuso (LIDL-TREK) + 00h 17′ 48” 8. Richard Carapaz (EF Education – Easypost) + 00h 20′ 00 9. Tom Pidcock (Pinarello-Q36.5 Pro Cycling Team) + 00h 29′ 28” 10. Jordan Jegat (Totalenergies) + 00h 33′ 21”