Instituti i Krimeve të Kryera Gjatë Luftës në Kosovë (IKKL) ka realizuar një vizitë zyrtare në Strugë dhe Dibër, në Maqedoninë e Veriut, në kuadër të misionit për grumbullimin dhe dokumentimin e materialeve arkivore që dëshmojnë dëbimin e qytetarëve të Kosovës gjatë luftës së viteve 1998–1999.
Sipas njoftimit, gjatë qëndrimit në Strugë, delegacioni u takua me përfaqësues të Shoqatës “Nënë Tereza”, të cilët i dorëzuan Institutit 1,600 dokumente arkivore me vlerë historike. Po ashtu, IKKL pranoi materiale elektronike dhe dokumente nga individë e bashkëpunëtorë të tjerë që kanë ruajtur dëshmi të periudhës së luftës.
Delegacioni zhvilloi takime edhe me kryetarin e Komunës së Strugës, Mendi Çyra, si dhe me personalitete të tjera, të cilët shprehën gatishmërinë për të mbështetur ruajtjen dhe dokumentimin e dëshmive të luftës.
Misioni vazhdoi në Dibër, ku Instituti pranoi materiale të rëndësishme arkivore dhe intervista nga dëshmitarë të luftës, ndërsa u takua edhe me përfaqësues të Komunës së Dibrës, Shoqatës “Nënë Tereza”, Shoqatës humanitare “Hëna”, OJQ-së “El Hilal” dhe individë që kishin kontribuar në strehimin dhe ndihmën për qytetarët e Kosovës gjatë viteve 1998–1999.
IKKL theksoi se vizita ka kontribuar në pasurimin e fondit dokumentar të Institutit dhe shprehu mirënjohje për institucionet, organizatat dhe individët që kanë ofruar materiale dhe mbështetje për dokumentimin e krimeve dhe dëbimit të qytetarëve të Kosovës gjatë luftës.