Presidenti ukrainas, Volodymyr Zelensky, ka shkarkuar komandantin e përgjithshëm të ushtrisë së vendit, Oleksandr Syrskyi, ka raportuar të mërkurën () televizioni BBC . Vendimi u mor vetëm disa ditë pas shkarkimit të ministrit të Mbrojtjes, Mykhailo Fedorov – një veprim që shkaktoi protesta në rrugë në mbarë vendin.
Thashethemet fillestare se fundi i mandatit të Fedorovit lidhej me një konflikt ndërmjet tij dhe Syrskyi u konfirmuan shpejt. Fedorov, 35 vjeç, është lavdëruar gjerësisht për energjizimin e Ministrisë dhe transformimin e forcave të armatosura, si dhe për udhëheqjen e një fushate kundër korrupsionit.
Syrskyi, 60 vjeç, shihet nga shumë njerëz në Ukrainë si komandant i shkollës sovjetike që ngurron të zbatojë ndryshime rrënjësore në ushtri. Syrskyi ka mbrojtur karrierën e tij në një fjalim lamtumire, duke shkruar në Telegram: “Një ushtri që po luftonte një fushatë të vështirë mbrojtëse dy vjet më parë tani është në ofensivë”.
“Po i dorëzoj pasardhësit tim një ushtri që jo vetëm që po mban vijën, por po përparon… Shpresoj sinqerisht që kjo ofensivë të vazhdojë”. Syrskyi u zëvendësua nga Mykhailo Drapatyi, 43 vjeç, i cili është gjeneral popullor dhe i përkushtuar në beteja. “Do të punoj me përgjegjësi, me fokus të plotë dhe me respekt për njerëzit që po mbrojnë vendin tonë sot”, ka shkruar Drapatyi në Facebook.
Përgatiti: Rexhep Maloku – Kallxo.com