Arsenali ka bërë përparim të rëndësishëm në përpjekjet për të transferuar sulmuesin argjentinas Julian Alvarez, ndërsa raportimet e fundit sugjerojnë se Atletico Madridi ka zbutur qëndrimin e tij dhe mund të pranojë largimin e lojtarit gjatë kësaj vere.
Sipas mediumit Caught Offside, drejtuesit e klubit spanjoll u kanë bërë të ditur përfaqësuesve të Alvarezit se janë të gatshëm të shqyrtojnë një marrëveshje me klubin londinez. Raporti thekson se drejtori sportiv i Arsenalit, Andrea Berta, ka zhvilluar kontakte të drejtpërdrejta me sulmuesin 26-vjeçar, i cili thuhet se është i hapur për një rikthim në Premier League.
Barcelona dhe Real Madridi janë përmendur gjithashtu si klube të interesuara për Alvarezin, por Atletico nuk preferon të negociojë me rivalët e saj në La Liga. Kjo situatë e vendos Arsenalin në një pozitë më të favorshme, ndërsa PSG ende nuk ka paraqitur ofertë zyrtare për argjentinasin.
Megjithatë, transferimi mbetet i komplikuar, pasi Arsenali duhet të bindë lojtarin për t’u larguar nga futbolli spanjoll dhe njëkohësisht të arrijë një marrëveshje financiare që do ta kënaqte Atletico Madridin. Në anën tjetër, gazetari i The Athletic, James McNicholas, raporton se qëndrimi zyrtar i Atletico Madridit nuk ka ndryshuar.
Sipas tij, trajneri Mikel Arteta vazhdon të jetë admirues i madh i Alvarezit, por klubi madrilen këmbëngul se sulmuesi nuk është në shitje, as për klubet e La Ligës dhe as për ato jashtë Spanjës.