Roma ka hequr dorë nga transferimi i Crysencio Summerville, pasi Al-Hilal ka paraqitur një ofertë shumë më të lartë për West Ham United dhe një pagë shumë më të madhe për lojtarin.
Klubi italian ishte gati të finalizonte transferimin gjatë ditës së sotme për një shumë pak më të ulët se 50 milionë euro, përfshirë bonuset, ndërsa i kishte ofruar futbollistit një kontratë me pagë prej 4 milionë eurosh në sezon.
Megjithatë, Al-Hilali i drejtuar nga Simone Inzaghi ndërhyri në momentet e fundit me një ofertë shumë më të fuqishme, duke e kaluar Romën si në shumën e transferimit, ashtu edhe në kushtet personale. Sipas The Athletic, oferta e klubit saudit arrin në 80 milionë euro (68.23 milionë funte), ndërsa ekzaminimet mjekësore me Al-Hilalin pritet të caktohen së shpejti.
Summerville është gjithashtu pranë nënshkrimit të kontratës, e cila sipas mediave italiane do t’i sigurojë një pagë mes 12 dhe 15 milionë euro në sezon, në varësi të bonuseve. Roma e kuptoi se nuk mund të konkurronte me këto shifra dhe shpresonte që pjesëmarrja në Ligën e Kampionëve ta bindte holandezin të zgjidhte klubin italian.
Megjithatë, oferta financiare e Al-Hilalit rezultoi shumë më joshëse për reprezentuesin e Holandës, i cili zhvilloi një Kupë Bote të mirë në SHBA, Kanada dhe Meksikë, duke kontribuar me dy gola dhe dy asistime.
Interesimi i Al-Hilalit për Summerville ishte raportuar fillimisht më 14 korrik nga gazetari Sacha Tavolieri, i cili kishte bërë të ditur se oferta ishte 60 milionë euro plus 5 milionë euro bonuse. 24-vjeçari sezonin e kaluar shënoi shtatë gola dhe dhuroi pesë asistime në 34 paraqitje me West Ham United, por nuk arriti ta ndihmonte skuadrën të shmangte rënien nga Premierliga.