Shtetet e Bashkuara kanë vendosur të shtojnë praninë e tyre ushtarake në Lindjen e Mesme, duke dislokuar avionë të tjerë luftarakë dhe mjete mbështetëse në rajon, ndërsa situata me Iranin vazhdon të mbetet e tensionuar.
Sipas zyrtarëve amerikanë, Uashingtoni pritet të dërgojë avionë luftarakë të tipit F-16 dhe F-35 nga bazat ushtarake në Evropë, si dhe avionë cisternë për furnizim me karburant në ajër. Ky përforcim synon të rrisë gatishmërinë operacionale të forcave amerikane dhe t’i ofrojë administratës më shumë alternativa në rast të një përshkallëzimi të mëtejshëm.
Presidenti Donald Trump ka zhvilluar ditët e fundit konsultime me ekipin e sigurisë kombëtare për të shqyrtuar skenarët e mundshëm të reagimit ndaj zhvillimeve të fundit. Mes opsioneve të diskutuara janë edhe veprime ushtarake kundër infrastrukturës strategjike iraniane, përfshirë objektet e eksportit të naftës dhe impiantet bërthamore.
Megjithatë, administrata amerikane nuk ka hequr dorë nga mundësia e një zgjidhjeje diplomatike. Sekretari amerikan i Shtetit, Marco Rubio, ka deklaruar se kanalet e negociatave mbeten të hapura dhe se SHBA është e gatshme të rikthehet në dialog nëse krijohen kushtet e nevojshme.
Lëvizja e fundit e Uashingtonit vjen në një kohë kur zhvillimet në Lindjen e Mesme po ndiqen me shqetësim nga komuniteti ndërkombëtar, për shkak të rrezikut të zgjerimit të konfliktit në rajon. Sinjali – aty ku e vërteta flet para lajmit!