Një burrë nga Malisheva ka denoncuar në Policinë e Kosovës ish-bashkëshorten e tij, M.M., pasi pretendon se ka marrë fëmijët e tyre dhe është larguar drejt Francës pa pëlqimin e tij. Në një prononcim, H.I. ka deklaruar se, që nga momenti kur ish-bashkëshortja është larguar me fëmijët, ai nuk ka pasur më asnjë kontakt me ta.
Për këtë arsye, ai thotë se i është drejtuar organeve të rendit, duke kërkuar ndihmë për t’i takuar dhe për t’u kujdesur për fëmijët e tij. Sipas tij, ata ndodhen aktualisht në proces të ndarjes, ndërsa ai pretendon se arsyet që kanë çuar në këtë vendim janë tradhtia dhe braktisja e fëmijëve nga ana e ish-bashkëshortes.
I njëjti ka deklaruar se ish-gruaja nuk e ka bërë për herë të parë këtë veprim. Sipas tij, ajo mori dy herë fëmijët dhe u largua, megjithatë, ai shtoi se herën e parë e pranoi rikthimin e saj “për hatër të fëmijëve”. “Pas më shumë se dy jave u kthye, qëndruam afër një muaj e gjysmë bashkë..” , u shpreh ai. Megjithatë, ai thekson se kërkesa e tij e vetme është kthimi i fëmijëve në Kosovë.
“Unë nuk e kërkoj atë [ish-bashkëshorten], i kërkoj fëmijët e mi. Asaj i them udha e mbarë, por fëmijët m’i kthe në Kosovë. Dua t’i shoh dhe të kujdesem për ta” , ka deklaruar H.I. për redaksinë e klanit. Lidhur me rastin ka njoftuar edhe Policia e Kosovës dhe është iniciuar hetimi.
Sipas raportit zyrtar, ankuesi ka raportuar se bashkëshortja e tij, me të cilën është në proces të ndarjes, ka marrë fëmijët dhe është larguar në drejtim të Francës.