Pse Spanja nuk është “kampione jozyrtare e botës”, edhe pse e fitoi Botërorin? Edhe pse Spanja është kampione e Kupës së Botës 2026, një tjetër kombëtare surprizë ka fituar titullin e “kampiones jozyrtare të botës”. Pas gjashtë javësh me ndeshje emocionuese dhe shumë polemika në Amerikën e Veriut, Kupa e Botës 2026 ka përfunduar.
Pas një fushate mbresëlënëse, gjatë së cilës pranoi vetëm një gol në gjithë turneun, Spanja u shpall kampione e botës falë fitores 1-0 ndaj Argjentinës në finale.
Edhe pse shumëkush mendonte se nuk kishte bindur në fazat e hershme të turneut, paraqitja e Spanjës në këtë Botëror konsiderohet si një nga më të mirat e viteve të fundit, me kampionët e Evropës 2024 që konfirmuan statusin e tyre si skuadra më e mirë në botë.
Megjithatë, ekziston edhe një kombëtare tjetër që mund të pretendojë se ka një “avantazh” ndaj kampionëve të botës 2026, pasi Spanja nuk është “kampionia jozyrtare e botës”. Ky titull i takon Turqisë, e cila, ndonëse u eliminua në mënyrë zhgënjyese që në fazën e grupeve të Kupës së Botës, u shpall sërish kampione jozyrtare e botës falë fitores 3-2 ndaj Shteteve të Bashkuara.
Fushata e Turqisë në Botërorin 2026 ishte për t’u harruar për tifozët e saj, pasi kombëtarja u eliminua para ndeshjes së fundit të Grupit D ndaj SHBA-së, duke mos arritur të shënojë asnjë gol ndaj Australisë dhe Paraguait, pavarësisht se kishte regjistruar plot 62 goditje në dy takimet.
Megjithatë, fitorja e vetme në turne, ajo ndaj SHBA-së, i mjaftoi Turqisë për të marrë titullin e “kampiones jozyrtare të botës”, pasi amerikanët e kishin fituar këtë status më 19 qershor, kur mposhtën Australinë me rezultat 2-0 në ndeshjen e dytë të fazës së grupeve.
Australia e kishte mbajtur këtë titull që nga fillimi i Kupës së Botës, pasi e kishte fituar ndeshjen e parë ndja Turqisë, e kjo e fundit e kishte marrë këtë titull me një fitore ndaj Kosovës, në mars. Kampionati Jozyrtar Botëror i Futbollit (Unofficial Football World Championships – UFWC) është një sistem i krijuar nga tifozët për të përcaktuar kombëtaren më të mirë në botë.
Ideja lindi pasi Skocia mposhti Anglinë në vitin 1967. Renditja bazohet në statistika si numri i fitoreve, përqindja e fitoreve dhe diferenca e golave, duke marrë parasysh vetëm ndeshjet mes kombëtareve. Për të fituar titullin, një kombëtare duhet të mposhtë ekipin që mban aktualisht kurorën, duke marrë kështu statusin e kampiones së re jozyrtare.
Ky sistem funksionon në mënyrë të ngjashme me titujt linealë në sportet e luftimit. Anglia ishte fituesja e parë e këtij titulli pas fitores 4-2 ndaj Skocisë në mars të vitit 1873. Organizatorët e këtij klasifikimi e kanë rindërtuar historikun në mënyrë retrospektive, duke nisur nga ndeshjet e para ndërkombëtare mes Anglisë dhe Skocisë.
Dy kombëtaret britanike kanë dominuar historinë e këtij titulli. Skocia kryeson renditjen me 86 tituj të kampiones jozyrtare të botës, hera e fundit në mars të vitit 2007. Anglia e ka fituar këtë status 73 herë, për herë të fundit në qershor të vitit 2000, ndërsa Uellsi dhe Irlanda e Veriut e kanë fituar respektivisht 12 dhe pesë herë.
Turqia, mbajtësja aktuale e titullit, e ka fituar atë katër herë, duke u renditur në vendin e 33-të në tabelën historike. Në fund të renditjes ndodhen Curaçao, Izraeli, Sierra Leone, Koreja e Jugut dhe Venezuela, të cilat e kanë fituar këtë titull vetëm nga një herë.