Çmimet e naftës janë rritur për rreth 3% të hënën (), me çmimin e naftës “Brent” që ka shkuar mbi 90 dollarë për fuçi, ndërsa përshkallëzimi i armiqësive ndërmjet SHBA-së dhe Iranit në Lindjen e Mesme ka kufizuar dërgesat e naftës përmes Ngushticës së Hormuzit, raporton Reuters .
Kontratat e ardhshme të naftës së papërpunuar “Brent” u rritën për 2.77 dollarë, ose 3.14% – në 90.87 dollarë – duke prekur nivelin më të lartë që nga 11 qershori dhe rritur fitimet pas rritjes prej 15.9% të javës së kaluar, që është fitimi më i madh javor që nga prilli.
Nafta e papërpunuar amerikane, “West Texas Intermediate” (WTI) ishte në 84.84 dollarë për fuçi, me 2.35 dollarë, ose 2.85% më shumë, më e larta që nga 12 qershori. Çmimet e muajit të parë rritën fitimet për 15.5% javën e kaluar, që ishte rritja më e madhe javore që nga fillimi i marsit.
Konflikti në Lindjen e Mesme u përshkallëzua gjatë fundjavës me SHBA-në që kreu për të nëntën natë me radhë sulme kundër Iranit, ndërsa aleatët e SHBA-së, Kuvajti dhe Bahrejni, raportuan të tjera sulme iraniane.
“Çmimi i naftës ‘ICE Brent’ kaloi mbi 90 dollarë për fuçi këtë mëngjes pa shenja të ndaljes së përshkallëzimit në Gjirin Persik”, kanë thënë analistët e ING-së në shënimin e së hënës. “SHBA-ja dhe Irani vazhdojnë të shkëmbejnë sulme, të cilat po rezultojnë vdekjeprurëse për të dyja palët.
Nëse ky përshkallëzim nuk kontrollohet, ne mund të kthehemi në një mjedis sulmesh në shkallë të gjerë në krejt Gjirin Persik”.
Korpusi i Gardës Revolucionare Islamike ka njoftuar të hënën se dy tankerë nafte kishin shpërthyer dhe ishin imobilizuar pasi u përpoqën të kalonin atë që e përshkroi si një rrugë të pasigurt jugore përmes Ngushticës së Hormuzit, duke pretenduar se ishin inkurajuar nga ushtria amerikane për të përdorur kalimin. Reuters nuk mundi ta verifikonte menjëherë incidentin.
Në ditët e fundit të dyja palët kanë synuar trafikun detar, me SHBA-në që thotë se po zbaton bllokadën detare ndaj porteve iraniane dhe Iranin që thekson se synon tankerët që shkelin rregullat e saj për lundrimin në Ngushticën e Hormuzit, e cila zakonisht përpunon një të pestën e tregtisë globale të naftës. Përgatiti: Rexhep Maloku – Kallxo.com