Janë publikuar formacionet zyrtare për finalen e madhe të Kupës së Botës 2026 mes Spanjës dhe Argjentinës, një përballje që do të zhvillohet në ‘MetLife Stadium’ të Nju Xhersit. Trajneri i Spanjës, Luis de la Fuente, nuk ka bërë ndryshime në formacionin titullar, duke i besuar të njëjtit ekip që luajti në çerekfinale dhe gjysmëfinale.
“La Roja” zbret në fushë me: Unai Simón; Pedro Porro, Cubarsí, Laporte, Cucurella; Rodri, Fabián; Lamine Yamal, Dani Olmo, Baena; Oyarzabal. De la Fuente vazhdon t’i besojë Fabián Ruiz në mesfushë përkrah Rodrit, ndërsa Pedri nis përsëri nga stoli.
Në formacion mbeten gjithashtu të pandryshuar Pedro Porro në krahun e djathtë të mbrojtjes dhe Dani Olmo në rolin e organizatorit pas sulmuesit. Nga ana tjetër, trajneri i Argjentinës, Lionel Scaloni, ka vendosur të bëjë tri ndryshime në kërkim të trofeut të dytë radhazi botëror pas triumfit në Katar 2022.
Formacioni i Argjentinës: Emiliano Martínezn; Gonzalo Montiel, Cristian Romero, Lisandro Martínez, Nicolás Tagliafico; Rodrigo De Paul, Enzo Fernández, Alexis Mac Allister, Nicolás González; Lionel Messi, Julián Álvarez. Ndryshimi i parë vjen në krahun e djathtë të mbrojtjes, ku Gozalo Montiel rikthehet titullar në vend të Nahuel Molina-s.
Montiel fitoi besimin e Scalonit pas paraqitjes së tij pozitive në pjesën e dytë të ndeshjes së fundit. Në mesfushë rikthehet Rodrigo De Paul, i cili ishte lënë në stol ndaj Anglisë, por ndikoi shumë pas hyrjes në fushë. Karakteri dhe përvoja e tij në ndeshje të mëdha kanë bindur Scalonin që ta aktivizojë nga minuta e parë.
Surpriza më e madhe është mungesa e Leandro Paredes, i cili nuk ishte në gjendjen optimale fizike. Në vendin e tij aktivizohet Nicolás González, duke i dhënë Argjentinës më shumë forcë dhe ritëm në krah.
Finalja pritet të jetë një duel mes dy filozofive të ndryshme: Spanja e bazuar te kontrolli, teknika dhe qarkullimi i topit, përballë Argjentinës së Messit, një skuadër me eksperiencë, karakter dhe mentalitet fituesi.