Vetëm 48 orë para finales së Kupës së Botës kundër Argjentinës, gjendja fizike e Lamine Yamalit ka ngritur shqetësime në kampin e Spanjës. Sipas raportimeve nga New Jersey, ylli i “La Roja” nuk duket në formën më të mirë fizike. Të enjten ai mungoi në stërvitje, duke qëndruar ulur në fushë gjatë pjesës së seancës së hapur për mediat, ndërsa bashkëlojtarët zhvillonin ushtrimet e zakonshme.
Edhe një zhvillim tjetër ka shtuar dyshimet. Sot, në qendrën stërvitore të Red Bull në Melanie Lane, Yamal ishte planifikuar të jepte një intervistë për gazetën katalanase Sport, por takimi u anulua në momentet e fundit. Sipas versionit zyrtar, intervista u anulua sepse sulmuesi dëshiron të përqendrohet plotësisht te finalja.
Megjithatë, kjo ka ngjallur pikëpyetje, pasi pothuajse të gjithë futbollistët e Spanjës kanë folur me mediat gjatë ditëve të fundit, ndërsa Yamal zakonisht nuk mungon në intervistat e organizuara nga federata.
Këto zhvillime kanë shtuar shqetësimin se 18-vjeçari mund të mos jetë në gjendje optimale fizike në prag të sfidës më të rëndësishme të karrierës së tij, edhe pse deri tani nuk ka asnjë konfirmim zyrtar për një dëmtim.