Galatasaray ka nisur lëvizjet për të siguruar shërbimet e Brahim Diazit, duke vendosur kontaktet e para me përfaqësuesit e sulmuesit të Real Madridit. Skuadra kampione e Turqisë synon të forcojë repartin ofensiv pas transferimit të Lesley Ugochukwu, ndërsa futbollisti maroken është vendosur në krye të listës së objektivave për këtë merkato verore.
Sipas mediave, drejtuesit e Galatasarayt tashmë kanë zhvilluar bisedime fillestare me agjentët e 26-vjeçarit. Gjatë ditëve në vijim pritet të kontaktojnë edhe Real Madridin për të kuptuar nëse ekziston mundësia e arritjes së një marrëveshjeje.
Trajneri Okan Buruk dëshiron të afrojë një lojtar me tipare sulmuese, i cili mund të aktivizohet si organizator loje, por edhe në të dy krahët e sulmit. Brahim Diaz konsiderohet një profil që i plotëson këto kërkesa. Ish-lojtari i Manchester Cityt dhe Milanit njihet për teknikën, driblimet, krijimtarinë dhe aftësinë për të depërtuar në hapësira të ngushta.
Për më tepër, ai mund të luajë në disa role të ndryshme në fazën ofensive. Pas një periudhe të suksesshme në huazim te Milani, Diaz u rikthye te Real Madridi, ku gradualisht ka fituar një rol të rëndësishëm në skuadrën madrilene. Aktualisht, reprezentuesi i Marokut është ende pjesë e Real Madridit dhe ka kontratë me klubin spanjoll.
Megjithatë, mbetet të shihet nëse “Los Blancos” do të jenë të gatshëm të negociojnë largimin e tij gjatë kësaj vere. Sinjali – aty ku e vërteta flet para lajmit!