Një 18-vjeçar në Britani të Madhe është dënuar pasi shkaktoi një aksident tragjik ku humbi jetën një pensionist 84-vjeçar, ndërsa pas përplasjes u largua nga vendi i ngjarjes. Ngjarja ndodhi në rrugën West Dyke Road në Redcar, North Yorkshire, ku i riu Sonny Horsfall humbi kontrollin e një automjeti Audi A4 dhe doli nga rruga.
Makina kaloi në një hapësirë me bar, u përplas me një pemë dhe më pas goditi të moshuarin, i cili po ecte në një shteg këmbësorësh. Sipas dëshmive në gjykatë, viktima pësoi plagë të rënda nga përplasja dhe ndërroi jetë në vendngjarje. Pas aksidentit, 18-vjeçari është larguar pa pritur mbërritjen e ekipeve emergjente.
Pak kohë më vonë, ai i ka dërguar një mesazh një shoku ku kishte shkruar: “Kam vrarë dikë”, duke pranuar se kishte humbur kontrollin e automjetit dhe kishte goditur një person. Gjykata ka zbuluar gjithashtu se i riu kishte blerë makinën vetëm disa orë para aksidentit dhe se në momentin e ngjarjes nuk kishte të drejtë ligjore për të drejtuar automjet.
Prokuroria ka deklaruar se automjeti kishte pësuar dëmtime të mëdha nga përplasja, ndërsa dëshmitarët kishin raportuar për gjendjen e rëndë të viktimës pas aksidentit.
Rasti ka shkaktuar reagime të mëdha në opinion, veçanërisht për faktin se i riu, pas largimit nga vendi i ngjarjes, kishte vazhduar aktivitetet e tij normale, përfshirë edhe porositjen e ushqimit, vetëm pak kohë pas aksidentit fatal. Sinjali – aty ku e vërteta flet para lajmit!