Një atentat i rëndë ka tronditur Ekuadorin, ku është vrarë David Macías, vëllai i Adolfo Macías, i njohur me nofkën “Fito”, një nga figurat më të njohura të krimit të organizuar në vend.
Sipas autoriteteve ekuadoriane, 35-vjeçari, i cili konsiderohej drejtues rajonal i organizatës kriminale “Los Choneros”, u ekzekutua në orët e para të së dielës në një banesë me qira në zonën bregdetare të Olónit. Dëshmitarët kanë deklaruar se autorët ishin të veshur me uniforma policore, çka u mundësoi të hynin në objekt pa ngjallur dyshime.
Pas sulmit, ata u larguan nga vendi i ngjarjes dhe deri më tani nuk është raportuar për ndonjë të arrestuar. Hetuesit po shqyrtojnë disa pista, ndërsa nuk përjashtohet mundësia që vrasja të lidhet me rivalitetet mes grupeve kriminale ose me përplasjet e brendshme për kontrollin e organizatës.
“Los Choneros” është një nga grupet më të fuqishme kriminale në Ekuador dhe është shpallur organizatë terroriste e huaj nga Shtetet e Bashkuara. Organizata akuzohet për përfshirje në trafikun ndërkombëtar të drogës dhe për rritjen e dhunës në vend. Ngjarja vjen në një periudhë të vështirë për këtë grup kriminal.
Adolfo Macías ndodhet në Shtetet e Bashkuara, ku pret gjykimin pas ekstradimit nga Ekuadori, ndërsa një tjetër vëlla i familjes Macías, Javier, u arrestua muajin e kaluar në Kolumbi. Sinjali – aty ku e vërteta flet para lajmit!