Presidenti i Ukrainës, Volodymyr Zelensky, ka njoftuar se vendi do të ketë së shpejti një kryeministër dhe kabinet të ri qeveritar, duke paralajmëruar një riorganizim të rëndësishëm politik. Përmes një postimi në rrjetin social X, Zelensky tha se ka diskutuar ndryshimet me kryeministren aktuale, Yuliia Svyrydenko, duke theksuar se është koha për rinovimin e Qeverisë.
“Ukraina po ndryshon strategjinë e saj politike. Këto ndryshime kërkojnë një rinovim të Kabinetit të Ministrave”, shkroi ai. Zelensky falënderoi Svyrydenkon për punën e saj si kryeministre dhe bëri të ditur se i ka ofruar një detyrë të re, të rëndësishme, në marrëdhëniet me një partner kyç të Ukrainës.
Megjithatë, ai nuk dha detaje se cili do të jetë posti i ri apo kush do ta zëvendësojë në krye të qeverisë. Nga ana e saj, Svyrydenko u shpreh krenare për punën e bërë gjatë mandatit dhe tha se mbetet “e gatshme t’i shërbejë shtetit ukrainas”. Sipas procedurave në Ukrainë, ndryshimet në kabinet duhet të miratohen nga parlamenti.
Megjithatë, që nga fillimi i pushtimit rus në shkurt të vitit 2022, shumica e deputetëve kanë mbështetur iniciativat e presidentit Zelensky. Njoftimi për riformatimin e qeverisë vjen në një kohë kur sulmet ruse vazhdojnë, raporton Euronews, transmeton Sinjali.
Gjatë natës, të paktën tre persona u vranë në rajonin e Dnipropetrovskut, ndërsa një tjetër humbi jetën pas një sulmi me dron në Kherson. Ndërkohë, të hënën liderët e vendeve aleate të Ukrainës, në kuadër të “Koalicionit të Vullnetit”, do të mblidhen në Paris për të diskutuar hapat e ardhshëm drejt përfundimit të luftës. Sinjali – aty ku e vërteta flet para lajmit!