Kongresmeni amerikan Ro Khanna ka deklaruar se u ndalua për rreth 90 minuta nga kolonë izraelitë gjatë një vizite në Bregun Perëndimor të pushtuar, duke e cilësuar incidentin si momentin më shqetësues të udhëtimit të tij treditor në territorin palestinez.
Sipas mediave izraelite dhe amerikane, Khanna, i njohur për kritikat e tij ndaj politikës së vendbanimeve izraelite, tha se kolonët e armatosur bllokuan automjetin e delegacionit të tij pranë fshatit palestinez Khirbet Zanuta, në zonën e Hebronit, dhe e penguan të vazhdonte rrugën.
Duke folur për incidentin, kongresmeni u shpreh se u ndje i frikësuar dhe i pafuqishëm, ndërsa pretendoi se kolonët mbanin armë amerikane, dëmtuan automjetin e tij dhe se ushtarët izraelitë të mbërritur në vendngjarje nuk ndërhynë menjëherë për të zgjidhur situatën. Sipas tij, vetëm pas kontakteve me Ambasadën e SHBA-së dhe policinë izraelite iu lejua të vazhdonte vizitën.
Khanna tha se përvoja e bëri të reflektonte mbi situatën me të cilën përballen çdo ditë palestinezët që jetojnë nën pushtim. “ Imagjinoni si ndihen njerëzit çdo ditë, palestinezë nën pushtim, nëse do të mund ta bënin një kongresmen amerikan të ndihej i pafuqishëm për 90 minuta”, u shpreh ai.