Juventusi ka rikthyer interesimin për mbrojtësin e Milanit, Fikayo Tomori, rreth 18 muaj pasi tentativa e parë për transferimin e tij në Torino dështoi për shkak të refuzimit të vetë lojtarit.
Sipas “Gazzetta dello Sport”, drejtuesit e “Zonjës së Vjetër” po e konsiderojnë sërish seriozisht transferimin e mbrojtësit anglez, i cili vlerësohet për përvojën dhe njohjen e mirë të futbollit italian. Profili i tij thuhet se përputhet edhe me kërkesat e trajnerit Luciano Spalletti. Megjithatë, çdo lëvizje pritet të varet nga largimet që Juventusi do të realizojë gjatë verës.
Klubi synon fillimisht të reduktojë numrin e lojtarëve në skuadër, para se të nisë me afrimet e reja. Njëri prej futbollistëve që mund të largohet është Federico Gatti, i cili ka humbur vendin e titullarit për shkak të konkurrencës me Bremerin dhe po kërkon më shumë minuta në fushë. Napoli dhe disa klube turke raportohet se po e monitorojnë situatën e tij.
Në rast se Gatti largohet, Juventusi pritet t’i intensifikojë negociatat për Tomorin. Mbrojtësi anglez ka kontratë me Milanin deri në verën e vitit 2027, por ardhja e Mario Gilas mund t’ia reduktojë hapësirat në formacionin titullar. Kjo mund ta bëjë Tomorin më të hapur për një transferim në Torino.
Për Milanin, shitja e tij do të siguronte të ardhura të rëndësishme, ndërsa Juventusi e sheh si një mundësi të mirë në merkato, sapo të krijohet hapësira e nevojshme në skuadër. Që nga transferimi te Milani në vitin 2021, Tomori ka zhvilluar 214 ndeshje dhe ka shënuar shtatë gola.
Ai ka qenë një nga shtyllat e mbrojtjes kuqezi, duke kontribuar në fitimin e Scudettos në vitin 2022 dhe të Superkupës së Italisë. Sinjali – aty ku e vërteta flet para lajmit!