Komisioni Disiplinor i Autoritetit të Konkurrencës së Republikës së Kosovës (AKRK) ka shqiptuar masën disiplinore të pezullimit nga puna pa pagesë për një periudhë prej gjashtë muajsh ndaj inspektorit hetues të konkurrencës, Shemsi Elezi, raporton Sinjali.
Sipas vendimit, Komisioni ka aprovuar kërkesat për zhvillimin e procedurës disiplinore dhe ka konstatuar se zyrtari ka kryer shkelje të rënda disiplinore, duke vendosur pezullimin e tij nga pozita pa pagesë për gjashtë muaj.
Në arsyetimin e vendimit thuhet se Elezi ka refuzuar të marrë pjesë në një inspektim të përbashkët me Ministrinë e Industrisë, Ndërmarrësisë dhe Tregtisë dhe Administratën Tatimore të Kosovës, pavarësisht urdhrave të eprorëve.
Sipas Komisionit, ai gjithashtu nuk ka dorëzuar raportet mujore brenda afateve të përcaktuara dhe ka zhvilluar komunikime zyrtare jashtë zinxhirit hierarkik, duke paraqitur pretendime të rënda ndaj drejtuesve të institucionit, të cilat Komisioni i ka vlerësuar si të pambështetura me prova.
Komisioni ka vlerësuar se këto veprime përbëjnë mosrespektim të detyrave funksionale, të hierarkisë institucionale dhe të rregullave të Kodit të Mirësjelljes në Shërbimin Civil, duke dëmtuar funksionimin e institucionit. Për këtë arsye është konstatuar se një masë më e lehtë disiplinore nuk do të ishte proporcionale me natyrën dhe përsëritjen e shkeljeve.
Vendimi është marrë më dhe ndaj tij mund të paraqitet ankesë në Këshillin e Pavarur Mbikëqyrës për Shërbimin Civil të Kosovës, brenda afatit ligjor prej 30 ditësh nga dita e dorëzimit të vendimit. Suspendohet nga puna zyrtari i AKRK-së, Shemsi Elezi Sinjali – aty ku e vërteta flet para lajmit!