Një ngjarje e rëndë ka tronditur Qipron në orët e para të mëngjesit të sotëm. Një oficer policie, pjesë e Rojës Bregdetare, ka qëlluar me armë zjarri bashkëshorten e tij dhe më pas ka kryer vetëvrasje. Edhe pse raportimet fillestare sugjeruan se gruaja kishte ndërruar jetë, mjekët në spital konstatuan se ajo kishte shenja jete.
Aktualisht, e plagosura ndodhet e intubuar në gjendje jashtëzakonisht kritike për jetën. Incidenti i rëndë ndodhi rreth orës të mëngjesit, brenda një automjeti ku çifti po debatonte ashpër. Një kalimtar rasti, i cili vuri re sherrin dhe pa autorin duke e kapur gruan nga qafa, u përpoq të ndërhynte për të qetësuar situatën.
Sipas dëshmisë së tij, oficeri e ka kërcënuar duke i kërkuar të largohej, ndërsa i ka thënë bashkëshortes: “Thuaji se nuk po të bëj asgjë, ti je gruaja ime”. Megjithatë, viktima i është lutur kalimtarit për ndihmë. Në atë moment, autori ka nxjerrë pistoletën e shërbimit, ka kërcënuar dëshmitarin dhe menjëherë pas kësaj ka qëlluar mbi gruan e tij dhe më pas mbi veten.
Forca të shumta të Departamentit të Hetimeve Penale në Limasol kanë rrethuar zonën dhe po grumbullojnë provat e nevojshme për zbardhjen e plotë të rrethanave të ngjarjes.