Një ngjarje e rëndë ka tronditur shtetin amerikan të Xhorxhias, ku një burrë 63-vjeçar dyshohet se ka vrarë bashkëshorten dhe vajzën e tij pas një debati të ashpër familjar lidhur me kujdesin ndaj nënës së tij të moshuar. Sipas autoriteteve dhe raportimeve të mediave amerikane, konflikti filloi pasi vajza 37-vjeçare e akuzoi babanë e saj për neglizhencë ndaj gjyshes së saj.
Debati mes familjarëve raportohet se u përshkallëzua shpejt, duke përfunduar në të shtëna me armë zjarri. Policia ka bërë të ditur se gjatë incidentit në qytetin e vogël Oksford, rreth 64 kilometra në lindje të Atlantës, vajza u gjet e vdekur në vendngjarje, ndërsa bashkëshortja e autorit u dërgua në spital në gjendje kritike, por më pas ndërroi jetë si pasojë e plagëve të marra.
I dyshuari, i identifikuar si Ralph Minsey, thuhet se ka kontaktuar shërbimet emergjente menjëherë pas ngjarjes, duke pranuar veprimet e tij gjatë thirrjes në 911. Në deklarimet e tij, ai ka thënë se konflikti kishte shpërthyer për shkak të akuzave ndaj tij për mënyrën se si kujdesej për nënën e tij të moshuar, duke shtuar se “i kishte humbur kontrolli” gjatë debatit.
Ndërkohë, dëshmia e bashkëshortit të vajzës, i cili ndodhej në vendngjarje, përshkruan një përplasje të papritur që përfundoi tragjikisht, duke e detyruar atë të largohej për të mbrojtur fëmijët. Autoritetet në Xhorxhia kanë ngritur akuza për vrasje ndaj 63-vjeçarit, ndërsa hetimet për zbardhjen e plotë të rrethanave të ngjarjes janë ende në vazhdim.
Sinjali – aty ku e vërteta flet para lajmit!