Shpërndaje në: Heroi i Italisë në Kupën e Botës 2006, Marco Materazzi, është mahnitur nga debutimi përrallor i Kepit të Gjelbër në Botëror. Materazzi e ka vlerësuar vendin afrikan si befasinë më të madhe të turneut. Kepi i Gjelbër është grup ishujsh dhe prej vendeve më të vogla që është paraqitur ndonjëherë në Kupë të Botës.
Dhe ka bërë shumë tifozë për vete me serinë e ndeshjeve pa humbje. Tri barazime i mundësuan Kepit të avanconte në fazën nokaut nga vendi i dytë në grup. Në fazën nokaut, Kepi i Gjelbër luan me Argjentinën e Lionel Messit. “Kepi i Gjelbër është befasia më e madhe për momentin. Por tani duhet të luajë kundër kampionëve të botës, argjentinasve”, ka thënë Materazzi.
“Kepi i Gjelbër është autsajder. Por në 90 minuta futboll nuk e dini asnjëherë se çka mund të ndodhë”. 52-vjeçari Materazzi ka folur edhe për shkëlqimin e Messit që tashmë i ka gjashtë gola. “Argjentina është shumë më e mirë se Kepi i Gjelbër dhe ka një prej lojtarëve më të mirë në histori. Më pëlqen Messi kur luan dhe mezi pres ta shoh në ndeshje.
Të luash në moshën 39-vjeçare nuk është e lehtë dhe ai ende është njëri prej më të mirëve”, ka theksuar italiani i njohur. Prania e Kepit të Gjelbër në fazën nokaut shërben edhe si përkujtues për mungesën e Italisë në Botëror.