Manchester Unitedi dhe Chelsea mund të përballen në merkaton e verës për transferimin e Felix Nmecha, pasi Newcastle United është tërhequr nga gara për mesfushorin e Borussia Dortmundit. Nmecha është lidhur me disa klube gjatë kësaj vere dhe mund të largohet nga Dortmundi pas pjesëmarrjes së tij me Gjermaninë në Botërorin 2026.
Sipas “TEAMtalk”, ndërmjetësuesit e lojtarit kanë zhvilluar bisedime me disa klube të Premierligës për të vlerësuar mundësinë e një transferimi në javët e ardhshme.
Newcastle zhvilloi diskutime për një transferim të mundshëm, por skuadra e drejtuar nga Eddie Howe ka vendosur të fokusohet te objektiva të tjerë për mesfushën, pasi u tërhoq nga një marrëveshje që konsiderohej shumë e kushtueshme. Fillimisht u raportua se arsyeja kryesore ishte çmimi prej 100 milionë eurosh i vendosur nga Borussia Dortmundi.
Megjithatë, raporti më i fundit thotë se klubi gjerman është i gatshëm të negociojë për shumën e transferimit nëse paraqitet interes serioz. Burime të paidentifikuara pretendojnë se arsyeja e vërtetë pse transferimi te Newcastle nuk avancoi ishte vetë lojtari.
Nmecha kishte dyshime nëse kalimi në “St James’ Park” ishte hapi i duhur për karrierën e tij dhe, për këtë arsye, një transferim te Newcastle tani konsiderohet praktikisht i përjashtuar. Manchester Unitedi dhe Chelsea raportohen si dy klubet angleze me interesin më të madh për 25-vjeçarin, pasi të dyja kërkojnë të përforcojnë mesfushën këtë verë.
Sipas raportit, të dy klubet janë të impresionuara nga cilësitë atletike dhe teknike të reprezentuesit gjerman dhe besojnë se ai ka potencialin për t’u bërë një nga mesfushorët më të mirë në Evropë.
Skuadra e drejtuar nga Michael Carricku tashmë ka rënë dakord për të transferuar Ederson nga Atalanta për 35 milionë paund dhe pritet të afrojë edhe një, ose ndoshta dy, mesfushorë të tjerë gjatë kësaj vere. “Djajtë e Kuq” e konsideronin Elliot Andersonin si objektivin kryesor për mesfushën para se ai të pranonte transferimin te Manchester City.
Klubi vazhdon gjithashtu të ndjekë Mateus Fernandes, Alex Scott, Carlos Baleba dhe Angelo Stiller. Edhe Chelsea dëshiron të shtojë një mesfushor qendror në skuadër, megjithëse duket se Xabi Alonso është pranë ribashkimit me ish-lojtarin e Bayer Leverkusenit, Granit Xhakën, pas sezonit të tij të shkëlqyer me Sunderlandin.
Kjo do të thotë se, për momentin, një transferim i Nmechas te Manchester Unitedi ose Chelsea nuk duket shumë i mundshëm. Megjithatë, situata mund të ndryshojë nëse Borussia Dortmundi ul kërkesën financiare.
Raporti përfundon duke theksuar se çdo lëvizje gjatë kësaj vere do të varet nga transferimet e tjera në mesfushë, por Nmecha mbetet “fort në listën e ngushtë” të objektivave si për Manchester Unitedin, ashtu edhe për Chelsean..