Interesimi i Chelseat për Granit Xhakën tregon një ndryshim në qasjen e klubit londinez, i cili tani është më i gatshëm të transferojë futbollistë me përvojë, nëse ata i përshtaten profilit që kërkon skuadra.
Në vitet e fundit, Chelsea e ka ndërtuar strategjinë e merkatos duke investuar te talentet e rinj më premtues të futbollit botëror, duke u ofruar kontrata afatgjata me synimin që ata të formojnë bazën e suksesit të klubit në të ardhmen. Megjithatë, kjo qasje është kritikuar shpesh, pasi në momente kyçe skuadrës i ka munguar përvoja dhe lidershipi.
Tani, në “Stamford Bridge” ekziston një gatishmëri më e madhe për të afruar lojtarë të dëshmuar që mund të kenë ndikim të menjëhershëm, dhe Granit Xhaka konsiderohet si profili ideal. Mesfushori iu bashkua Sunderlandit vitin e kaluar nga Bayer Leverkuseni për 17 milionë funte, ndërsa 33-vjeçari zviceran ka kontratë me klubin deri në vitin 2028.
Xhaka luajti rol vendimtar në kualifikimin e Sunderlandit për garat evropiane sezonin e kaluar dhe klubi nuk ka dëshirë të heqë dorë nga një prej futbollistëve më me ndikim në skuadër. Për këtë arsye, besohet se Chelsea mund të detyrohet të paguajë deri në 35 milionë funte për ta siguruar transferimin e Xhakës, sapo ta zyrtarizojë interesimin e tij.
Megjithatë, burimet bëjnë të ditur se drejtuesit e Chelseat mund të mos jenë të gatshëm të paguajnë një shumë të tillë, duke u përballur kështu me një dilemë. Lajmi pozitiv për Chelsean është se vetë Xhaka është i interesuar për këtë transferim dhe pritet t’i ofrohet një kontratë që do ta mbante në klub deri në vitin 2029.
Megjithatë, edhe pse Chelsea e vlerëson shumë përvojën dhe cilësitë e tij si lider, në klub besojnë se pagesa e rreth 35 milionë funtesh për një futbollist në këtë fazë të karrierës do të ishte një investim me vlerë të diskutueshme.