Ndeshja hapëse e Kupës së Botës mes Republikës Demokratike të Kongos dhe Portugalisë shënoi një ngjarje historike. Republika Demokratike e Kongos jo vetëm që bëri paraqitjen e dytë në turne dhe të parën që nga viti 1974 kur njihej ende si Zaire, por goli i mrekullueshëm me kokë i Yoane Wissa në fund të pjesës së parë shënoi golin e parë në Kupën e Botës dhe i siguroi pikën e parë.
Ndërsa “Les Leopars” dolën në fushë, vëmendja ishte përqendruar jo vetëm tek lojtarët që mbanin veshur fanellën e famshme blu të Kongos, por edhe te lojtari i 12-të jozyrtar i ekipit që nodhej në tribuna Michel Kuka Mboladinga, i njohur më mirë me nofkën “Lumumba Vea” ose “Lumumba Jeton”.
Mboladinga është tifozi më i famshëm i ekipit kombëtar kongolez dhe u bë i njohur gjatë Kupës së Kombeve të Afrikës 2025 në Marok, ku ai qëndroi në majë të një piedestali me një vështrim të çeliktë gjatë çdo ndeshjeje të Kongos, duke mbetur krejtësisht i palëvizshëm me krahun e djathtë të ngritur nga fillimi deri në fund.
Kjo pozë është një homazh për Patrice Emery Lumumba, kryeministrin e parë të Kongos pasi ky vend fitoi pavarësinë nga Belgjika në qershor të vitit 1960, dikush me të cilin Mboladinga ka një ngjashmëri të habitshme. Ai u bë simbol i nacionalizmit kongolez gjatë luftës së tij kundër sundimit kolonial belg, e cila filloi kur Mbreti Leopold II themeloi Shtetin e Lirë të Kongos në vitin 1885.
“Besojeni ose jo, unë stërvitem. Në fakt mund të stërvitem 20 ditë në muaj, por gjithashtu pushoj shumë. Unë jam një statujë e gjallë. Klima nuk ka ndikim tek unë. Puna ime nuk është vetëm të qëndroj aty, por t’u komunikoj lojtarëve energji, forcë dhe fuqi. Kjo është ajo në të cilën po përqendrohem” – deklaroi Mboladinga.
Më shumë se gjashtë dekada më vonë, Lumumba mbetet një nga figurat më të nderuara në historinë kongoleze. Dhe nëpërmjet ritualit të tij, tashmë të famshëm të ditës së ndeshjes, Mboladinga po ndihmon ta mbajë gjallë trashëgiminë e tij.