Aktorja amerikane, Selma Blair, është arrestuar pas një incidenti të raportuar në një fluturim të kompanisë Delta Airlines drejt aeroportit John F. Kennedy në New York, bëjnë të ditur mediat amerikane. Sipas TMZ, incidenti ndodhi të dielën, kur aktorja dyshohet se tentoi të hapte derën e avionit gjatë fluturimit.
Situata më pas përshkallëzoi, ndërsa Blair raportohet se goditi një stjuardesë dhe kafshoi një tjetër. Selma Sipas raportimeve, pas uljes së avionit u kërkua ndihmë mjekësore për dy anëtare të ekipit, të cilat kishin pësuar lëndime. Njëra prej tyre u dërgua në spital.
Pas incidentit, Blair u arrestua dhe u dërgua në spital për vlerësim mjekësor, ku, sipas TMZ, ndodhej ende në momentin e raportimit. FBI-ja po heton ngjarjen, teksa në një regjistrim audio të komunikimeve të emergjencës thuhet se pasagjerja kishte goditur kokën në murin ndarës të avionit.
Përfaqësuesi i aktores deklaroi për TMZ se ajo kishte përjetuar një emergjencë mjekësore që çoi në sjelljen e pretenduar. Sipas tij, pas uljes së avionit, Blair mori menjëherë ndihmën e nevojshme dhe aktualisht ndodhet në gjendje të qëndrueshme. Deri më tani, nuk është bërë e ditur se çfarë e shkaktoi emergjencën mjekësore dhe nëse ndaj aktores do të ngrihen akuza penale.
Ky nuk është incidenti i parë i raportuar që përfshin aktoren gjatë një udhëtimi ajror. Në vitin 2016, ajo u nxor me barelë nga një avion pas një episodi shqetësues gjatë fluturimit.