Islanda ka votuar kundër rifillimit të negociatave për anëtarësim në Bashkimin Evropian, në një referendum të përcaktuar me diferencë të ngushtë. Sipas transmetuesit publik RUV, kampi “Jo” e ka siguruar fitoren, ndonëse mbetet edhe një zonë elektorale për konfirmimin zyrtar të rezultatit përfundimtar. Rezultatet treguan ndarje të thellë ndërmjet kryeqytetit dhe pjesës tjetër të vendit.
Shumica e votuesve në Reykjavik mbështetën rikthimin e bisedimeve, ndërsa zonat rurale dhe komunitetet e lidhura me peshkimin votuan kryesisht kundër. Në zonat jugore, veriperëndimore dhe verilindore, kundërshtarët e negociatave morën mbi 60 për qind të votave. Shqetësimi për rregullat evropiane mbi ndarjen e kuotave të peshkimit konsiderohet një nga arsyet kryesore të kundërshtimit.
Islanda aplikoi për anëtarësim në BE pas krizës financiare të vitit 2009, por negociatat u pezulluan në vitin 2013, pas ardhjes në pushtet të një koalicioni euroskeptik. Referendumi nuk është juridikisht detyrues, por qeveria e kryeministres Kristrún Frostadóttir kishte deklaruar se do ta respektonte vendimin e qytetarëve.
Pavarësisht rezultatit, marrëdhëniet e Islandës me BE-në nuk pritet të ndryshojnë rrënjësisht. Vendi do të vazhdojë të jetë pjesë e Zonës Ekonomike Evropiane dhe e hapësirës Schengen. Sinjali – aty ku e vërteta flet para lajmit!