Një mot ekstrem ka goditur këtë pasdite disa zona të Italisë, me tornado, breshër dhe erëra të fuqishme që kanë shkaktuar dëme të konsiderueshme në qytetin e Kremonës dhe në zona të tjera të vendit. Në Kremonë, stuhia ka dëmtuar rëndë disa ndërtesa, përfshirë Katedralen dhe Bashkinë.
Nga fuqia e erërave është dëmtuar çatia e njërës prej majave të Katedrales, ndërsa është shembur edhe çatia e kullës qytetare të Bashkisë, një nga gjurmët e mbetura të ndërtesës së vjetër të qytetit. Sipas raportimeve, rreth 40 persona kanë mbetur të plagosur.
Shumica kanë pësuar dëmtime të lehta, ndërsa një rast më serioz është regjistruar në Via Giuseppina, në periferi të Kremonës, ku një automjet është goditur nga një pemë e rrëzuar. Personat që ndodheshin brenda automjetit janë nxjerrë me ndihmën e banorëve dhe më pas të ekipeve të emergjencës.
Të plagosurit e tjerë janë goditur nga breshëri, copa çatie, tjegulla dhe materiale të shkëputura nga ndërtesat. Disa persona kanë kërkuar ndihmë mjekësore, kryesisht për dëmtime dhe gjendje shoku. Moti i keq ka prekur edhe zonën lindore të Bassa Piacentina, ku janë regjistruar reshje të dendura breshëri.
Në Castelsangiovanni, në kufi me provincën e Pavias, kokrrat e breshërit kanë arritur madhësinë e topave të tenisit. Shërbimet zjarrfikëse kanë marrë dhjetëra thirrje për ndihmë, kryesisht për pemë të rrëzuara dhe dëme në automjete. Stuhia ka shkaktuar dëme edhe në zonat bujqësore, veçanërisht në vreshta.
Në autostradën Piacenza-Torino, reshjet e forta detyruan disa drejtues mjetesh të ndalonin përkohësisht. Autoritetet kanë bërë të ditur se nuk ka pasur persona të lënduar. Probleme janë regjistruar edhe në Torino, ku ekipet e zjarrfikësve kanë ndërhyrë për të shpëtuar tetë persona të bllokuar në rrugë në zonën Clot de la Batüa, teksa po përpiqeshin të ktheheshin në banesat e tyre.
Personat janë nxjerrë nga zona dhe janë dërguar në një vend të sigurt. Ndërkohë, zjarrfikësit kanë nisur pastrimin e rrugës nga balta dhe mbeturinat, ndërsa aksi pritet të mbetet i mbyllur gjatë natës. Stuhitë kanë shkaktuar dëme edhe në provincën e Alessandrias.
Pemë janë rrëzuar në rrugë dhe mbi automjete, ndërsa tjegulla dhe struktura të tjera të ndërtesave janë dëmtuar nga erërat e forta. Zjarrfikësit kanë marrë rreth 50 kërkesa për ndërhyrje. Zonat e qytetit të Alessandrias, Tortonës dhe luginës së poshtme të Scrivias janë ndër më të prekurat nga era, shiu dhe breshëri.
Situata e rënduar atmosferike ka shkaktuar probleme edhe në zonat malore të Trentino-s. Mbi 800 alpinistë janë ndihmuar dhe shoqëruar drejt luginës pasi disa teleferikë u mbyllën për shkak të erërave të forta. Në lartësi mbi 2,500 metra, shpejtësia e erës ka kaluar 110 kilometra në orë. Ndërhyrjet më të mëdha janë kryer në Ciampac dhe Sass Pordoi.
Në Ciampac, rreth 400 persona mbetën të bllokuar pas ndalimit të teleferikut dhe u shoqëruan drejt luginës me automjete. Në Sass Pordoi, situata preku rreth 600 persona. Një pjesë e tyre u shoqëruan nga ekipet e shpëtimit përgjatë Qafës Forcella Pordoi, ndërsa për personat më të rrezikuar, përfshirë të moshuar dhe fëmijë, u mundësua përdorimi i teleferikut pas rihapjes së tij.
Sinjali – aty ku e vërteta flet para lajmit!