Një tragjedi e rëndë ka ndodhur në një maternitet në Islamabad të Pakistanit, ku një zjarr i fuqishëm ka shkaktuar vdekjen e 14 foshnjave të porsalindura. Flakët shpërthyen në orët e para të mëngjesit të së mërkurës, në një njësi të maternitetit të Pakistan Institute of Medical Sciences (PIMS), një prej spitaleve kryesore shtetërore të kryeqytetit.
Sipas dëshmive të familjarëve, shpëtimi i foshnjave u vonua, ndërsa disa prej tyre mbetën të bllokuara brenda repartit. Vetëm një nga 15 foshnjat që ndodheshin në repart arriti të shpëtonte. Dëshmitarët pretendojnë se dyert ishin të mbyllura dhe se u detyruan t’i thyenin ato, ndërsa ekipet e shpëtimit përdorën edhe dritaret për të hyrë në ndërtesë, shkruan BBC.
Zjarri dyshohet se nisi nga një njësi kondicioneri në katin e tretë të repartit për nënat dhe fëmijët. Familjarët kanë ngritur shqetësime të forta për mungesën e masave të sigurisë nga zjarri, duke pretenduar se nuk kishte dalje të përshtatshme emergjence dhe se disa prej personelit nuk ndodheshin në repart në momentin e ngjarjes.
Një nga baballarët e viktimave tha se kishte vizituar repartin për tetë ditë dhe se ndërtesa nuk kishte “siguri nga zjarri dhe dalje të përshtatshme”. Drejtori ekzekutiv i spitalit, Rana Imran Sikander, mohoi se dera e repartit ishte e kyçur, duke shpjeguar se ajo ruhej nga personeli për të parandaluar vjedhjen e foshnjave.