Policia Kombëtare e Spanjës ka arrestuar në Tarragona një të arratisur të konsideruar si “mjeshtri i arratisjeve”, i cili kërkohej nga autoritetet italiane përmes një urdhërarresti evropian. I dyshuari ka arritur të arratiset disa herë nga burgjet në Itali dhe Belgjikë.
Në arratisjen e tij të fundit, në dhjetor, ai u arratis nga një burg italian i sigurisë së lartë duke sharruar hekurat e një dritareje dhe duke zbritur nga ndërtesa përmes çarçafëve të lidhur mes vete. Në Belgjikë, ai dyshohet se kishte kaluar muret e burgut duke formuar një piramidë njerëzore me të burgosur të tjerë.
Policia e gjurmoi dhe e lokalizoi në një lagje të Tarragonës, ku dyshohej se po qëndronte. Gjatë ndërhyrjes për arrestimin e tij, i dyshuari rezistoi, ndërsa disa persona që ndodheshin me të tentuan t’ua pamundësonin policëve arrestimin. Gjatë përleshjes, njëri prej personave dyshohet se plagosi dy zyrtarë policorë, raporton Euronews, transmeton Sinjali.
Në momentin e arrestimit, “mjeshtri i arratisjeve” kishte me vete dokumente të falsifikuara identiteti dhe dy kartëmonedha nga 500 euro, të cilat dyshohet se mund të ishin të falsifikuara. Policia spanjolle e ka cilësuar atë si person “të rrezikshëm”, por identiteti i tij dhe veprat për të cilat ishte duke vuajtur dënimin nuk janë bërë publike.
Pas arrestimit, gjykata urdhëroi që ai të mbahet në paraburgim pa mundësi lirimi me kusht, derisa të përfundojë procedura e ekstradimit drejt Italisë. Sinjali – aty ku e vërteta flet para lajmit!