Evropa po përballet me një valë moti ekstrem, me zjarre masive, përmbytje si dhe stuhi të fuqishme. Mijëra persona janë evakuuar, ndërsa ekipet e emergjencave po luftojnë me zjarret, përmbytjet dhe ndërprerjet e energjisë elektrike. Situata është rënduar në kufirin mes Bosnje-Hercegovinës dhe Kroacisë, ku një zjarr i madh ka shpërthyer pranë zonës së Trebinjës.
Policia boshnjake mbylli autostradën kryesore që lidh Trebinjën me Dubrovnikun, duke detyruar mijëra turistë të ndryshojnë planet e tyre të udhëtimit. Disa fshatra pranë Ivanicës janë evakuuar pasi flakët iu afruan banesave. Sipas raportimeve të zjarrfikësve, disa kafshë u kapën nga zjarri. Në ndihmë të ekipeve boshnjake kanë mbërritur edhe zjarrfikës nga Dubrovniku, shkruan Euronews.
Zjarri është përhapur në një territor me diametër mbi 16 kilometra, në një terren të vështirë për t’u aksesuar. Temperaturat e larta, erërat e forta dhe mungesa e reshjeve prej muajsh e kanë përkeqësuar situatën. Zjarre dhe përmbytje në Spanjë Edhe Spanja është përballur me kushte të kundërta ekstreme të motit.
Në Tarragona, reshjet e dendura shkaktuan përmbytje, duke plagosur 11 persona dhe duke ndërprerë qarkullimin rrugor dhe hekurudhor. Në disa zona janë regjistruar më shumë se 145 milimetra shi. Në lindje dhe verilindje të vendit priten stuhi të tjera të forta, ndërsa në Galicia një sistem i fuqishëm atmosferik nga Atlantiku po sjell reshje të dendura.
Ndërkohë, në rajonin e Valencias, zjarrfikësit vazhdojnë të përballen me zjarre pyjore. Një prej tyre shpërtheu pranë Segorbes pas goditjes nga rrufeja dhe u përhap me shpejtësi për shkak të ndryshimit të drejtimit të erës. Më shumë se 1,000 banorë të Gatovës u detyruan të evakuoheshin për shkak të rrezikut që flakët të arrinin banesat.
Zjarri ka djegur rreth 630 hektarë, por ekipet e emergjencave kanë arritur ta stabilizojnë situatën. Kjo vjen pas temperaturave ekstreme të ditëve të mëparshme, kur termometrat në disa zona të Spanjës arritën deri në 44°C. Situata përmirësohet në Poloni Në Poloni, stuhitë e fuqishme kanë shkaktuar më shumë se 6,500 incidente që nga e premtja.
Për shkak të përmbytjeve dhe ndërprerjeve të energjisë elektrike, autoritetet evakuuan për masa sigurie edhe 12 kampe skautësh. Sipas shërbimit zjarrfikës polak, deri tani nuk janë raportuar viktima apo të plagosur. Për të dielën, paralajmërimet për stuhi mbeten në fuqi në disa zona të veriut të vendit.
Priten reshje të dendura, deri në 30 litra për metër katror, erëra me shpejtësi deri në 70 km/h dhe, në disa zona, breshër. Megjithatë, në pjesën tjetër të Polonisë situata meteorologjike është përmirësuar ndjeshëm dhe pritet një mot më i qetë.