Ermal Meta sjell Shqipërinë dhe zërin e protestës në skenën e “La Notte della Taranta” Shqipëria, Salento dhe trashëgimia arbëreshe u bashkuan në skenën e “La Notte della Taranta”, në Melpignano të Italisë, ku kantautori italo-shqiptar Ermal Meta ishte “Maestro Concertatore” i edicionit të 29-të të festivalit.
Përpara mijëra spektatorëve, Meta prezantoi këngën e tij të re “Nu simu nienti”, të realizuar në dialektin salentin në bashkëpunim me Claudio Prima. Titulli, që në shqip përkthehet “Nuk jemi asgjë”, përcjell një mesazh mbi marrëdhënien mes individit, pushtetit, tokës dhe komunitetit.
Kënga trajton tema sociale si pabarazia, abuzimi me pushtetin dhe mbrojtja e territorit, duke sjellë në vëmendje edhe zërin e komuniteteve që kërkojnë të mbrojnë tokën dhe mënyrën e tyre të jetesës.
Një tjetër moment i rëndësishëm i mbrëmjes ishte interpretimi i “Lule, lule”, këngës së traditës arbëreshe, përmes së cilës Meta solli në skenën italiane një pjesë të trashëgimisë shqiptare të ruajtur ndër breza.
I lindur në Shqipëri dhe i rritur artistikisht në Itali, Ermal Meta u shfaq kështu si një urë kulturore mes dy brigjeve të Adriatikut, duke bashkuar në të njëjtën skenë muzikën salentine, traditën arbëreshe dhe krijimtarinë bashkëkohore.
Në koncert morën pjesë edhe artistë të njohur si Alessandra Amoroso, Levante, Gisela João, Maria Mazzotta dhe Sayf, së bashku me Orchestra Popolare La Notte della Taranta, nën drejtimin artistik të Ermal Metës.
Përmes muzikës, edicioni i këtij viti i festivalit solli në qendër idetë e bashkëjetesës, identitetit, dialogut dhe fuqisë së komunitetit, duke e kthyer Melpignanon në një pikëtakim kulturor mes Shqipërisë, Italisë dhe Mesdheut.