Grupi Parlamentar i Partisë Demokratike të Kosovës (PDK) do të jetë sot nga ora në sallën e Kuvendit të Kosovës, në vazhdën e kërkesës për vazhdimin e seancës konstituive dhe konstituimin e Kuvendit. Këtij aksioni do t’i bashkohet edhe Aleanca, e cila ka paralajmëruar pjesëmarrjen e deputetëve të saj në Kuvend.
PDK njoftoi dje se i ka dërguar sërish kërkesë kryesuesit të seancës konstituive sipas moshës, Avni Dehari, që ta thërrasë vazhdimin e seancës, në përputhje me Kushtetutën, aktgjykimet e Gjykatës Kushtetuese dhe Rregulloren e Kuvendit.
Deputetja e Aleancës, Albana Bytyqi, tha dje se deputetët e kësaj partie do t’i bashkohen PDK-së në Kuvend, duke theksuar insistimin e partisë së saj për themelimin e institucioneve. “Çdo aktivitet që është thirrur nga çdo parti ne kemi qenë prezentë aty, por edhe nesër do të jemi aty patjetër”.
Afati i fundit kushtetues për konstituimin e Kuvendit përfundoi më 7 gusht, 30 ditë pas certifikimit të rezultateve. Kryetari i Vetëvendosjes, Albin Kurti, ka kërkuar “kohë shtesë” për bisedime për Presidentin gjatë seancës konstituive të mbajtur më 6 gusht, ku pritej të propozonte kryeparlamentarin e ri.
Të njëjtën kërkesë ai e përsëriti edhe në vazhdimin e seancës, e cila u mbajt jashtë afatit më 8 gusht. Kërkesa e tij u aprovua nga bashkëpartiaku i tij, kryesuesi i seancës, Avni Dehari, i cili që nga ajo ditë nuk ka thirrur më seancë.
Ndërkohë, ambasadat e vendeve të huaja në Kosovë u kanë bërë thirrje liderëve politikë që t’i japin fund krizës politike, në mes të paralajmërimeve për humbjen e mundësive. Sinjali – aty ku e vërteta flet para lajmit!