Shpërthimi i fundit i rasteve me Cyclospora ka rikthyer vëmendjen te siguria e frutave dhe perimeve që konsumohen të gjalla. Sipas ekspertëve, sallatat, frutat dhe perimet mund të shkaktojnë helmim ushqimor nëse janë të kontaminuara, por kjo nuk do të thotë se duhet të shmangen plotësisht. Marulja iceberg është ndër produktet që është lidhur me shpërthimin e fundit.
Specialistët këshillojnë që para përgatitjes së saj të lahen mirë duart, thika dhe dërrasa e prerjes. Gatimi në temperaturë të paktën 70°C mund të ndihmojë në eliminimin e parazitit.
Simptomat e infeksionit nga Cyclospora mund të shfaqen nga dy ditë deri në dy javë pas konsumimit të ushqimit të kontaminuar dhe përfshijnë diarre ujore, dhimbje barku, fryrje, të përziera, lodhje dhe humbje oreksi. Edhe perimet me gjethe, si llojet e ndryshme të sallatës, mund të kontaminohen me baktere si E. coli, Salmonella dhe Listeria.
Rreziku është më i madh kur ato konsumohen të gjalla, ndaj rekomandohet larja e tyre para konsumimit dhe shmangia e gjetheve që duken të prishura, të buta ose të qullëta. Një tjetër ushqim që kërkon kujdes janë filizat e papërpunuar, përfshirë filizat e jonxhës, fasules mung dhe tërfilit.
Mjedisi i ngrohtë dhe i lagësht që nevojitet për rritjen e tyre krijon gjithashtu kushte të favorshme për shumimin e baktereve. Gatimi i tyre mund të ulë ndjeshëm rrezikun. Rreziku nuk kufizohet vetëm te sallatat. Frutat, veçanërisht pjepri, shalqiri dhe manaferrat, mund të kontaminohen me baktere ose viruse.
Për këtë arsye, frutat duhet të lahen mirë para konsumimit, ndërsa frutat e prera duhet të ruhen në frigorifer dhe të mos lihen për një kohë të gjatë në temperaturë ambienti. Ekspertët theksojnë se, pavarësisht rasteve të helmimit ushqimor, frutat dhe perimet nuk duhet të hiqen nga dieta.
Respektimi i higjienës, larja e produkteve para konsumimit, ruajtja e duhur dhe shmangia e ushqimeve që duken të dëmtuara janë ndër mënyrat më të rëndësishme për të reduktuar rrezikun.