Lajme të këqija për trajnerin e Shkëndijës nga Tetova, Artim Pollozhanin, në prag të derbit me Strugën TL, i cili do të zhvillohet të hënën në FFM, në ndeshjen e fundit të javës së katërt. Pollozhani edhe në këtë ndeshje nuk do të mund të llogarisë në sulmuesin Marko Gjorgievski, për shkak të një dëmtimi. Sipas informacioneve të fundit, bëhet fjalë për tërheqje të muskulit.
Kujtojmë se Marko kishte paraqitje shumë të mira në Evropë, ku në dy ndeshje shënoi dy gola. Megjithatë, ai fillimisht u dëmtua gjatë nxehjes para derbit me Vardarin. Për këtë arsye, ai nuk luajti as në ndeshjen e kthimit kundër Hibernianit, dhe më pas mungoi edhe në përballjen me Bregallnicën në javën e kaluar.
Kjo do të jetë ndeshja e katërt radhazi në të cilën Gjorgievski nuk do të mund të jetë në formacionin e Shkëndijës. Është e qartë se mungesa e tij përbën një hendikep të madh për skuadrën tetovarë.