Shtetet e Bashkuara kanë vendosur një paketë të re sanksionesh ndaj zyrtarëve dhe kompanive kubaneze, duke shtuar presionin ekonomik ndaj qeverisë në Havana.
Sekretari amerikan i Shtetit, Marco Rubio, bëri të ditur se masat e reja përfshijnë nëntë kompani shtetërore që operojnë në sektorët e minierave, metalurgjisë dhe ndërtimit, si dhe Ministrinë kubaneze të Ndërtimit dhe disa zyrtarë të tjerë.
Sipas Rubios, personat dhe institucionet e sanksionuara janë të përfshira në aktivitete që Washingtoni i konsideron si përpjekje të regjimit kubanez për të përhapur ideologjinë komuniste dhe për të zhvilluar veprimtari kundër interesave amerikane.
“Sanksionet e shpallura sot e bëjnë të qartë se administrata Trump nuk do të tolerojë përpjekjet e regjimit kubanez për të financuar represionin e tij apo për të vazhduar aktivitetet subversive kundër Shteteve të Bashkuara”, deklaroi Rubio. Vendimi është dënuar menjëherë nga Havana.
Ministri i Jashtëm kubanez, Bruno Rodríguez, akuzoi Rubion se po përpiqet të ndëshkojë kompanitë kubaneze dhe të përkeqësojë më tej gjendjen ekonomike të vendit. Sipas tij, sanksionet do ta vështirësojnë edhe më shumë ofrimin e shërbimeve bazë për qytetarët, në një kohë kur Kuba po përballet me mungesa të karburantit, ilaçeve dhe ushqimeve.
Masat amerikane dhe kufizimet ndaj importeve të naftës kanë rënduar gjithashtu krizën energjetike në ishull, duke shkaktuar ndërprerje të shpeshta të energjisë elektrike dhe duke detyruar edhe spitalet të mbështeten në gjeneratorë emergjentë. Administrata Trump ka ndërmarrë masa edhe ndaj sektorit të turizmit, një prej burimeve kryesore të të ardhurave për ekonominë kubaneze.
Sinjali – aty ku e vërteta flet para lajmit!