Në Asamblenë e Përgjithshme të Komitetit Ndërkombëtar të Lojërave Mesdhetare (ICMG), ndër pikat e rendit të ditës ishte edhe raportimi për ecurinë e përgatitjeve për Lojërat Mesdhetare Prishtina 2030. Fjalën e mori ministri i Rinisë dhe Sportit, Blerim Gashani, i cili paraqiti segmentet kryesore ku Kosova ka shënuar progres në procesin përgatitor.
Përmes një prezantimi vizual, të mbështetur në statistika, dokumente dhe të dhëna konkrete, ministri Gashani paraqiti punën e bërë deri më tani dhe hapat e ndërmarrë në kuadër të përgatitjeve për atë që e pret Kosovën pas katër vitesh.
Raportimi ishte pjesë e procedurave të rregullta të ICMG-së, ku vendet organizatore prezantojnë para Asamblesë së Përgjithshme ecurinë e përgatitjeve për organizimin e Lojërave Mesdhetare. Prezantimi i Kosovës dhe i ekipit për Prishtina 2030 u përcoll edhe me një moment proteste. Delegacioni i Serbisë, në shenjë kundërshtimi, e lëshoi sallën gjatë prezantimit.
Pavarësisht këtij zhvillimi, Kosova vazhdon procesin përgatitor drejt vitit 2030, me synimin që Prishtina dhe vendet tjera nikoqire të jenë të gatshme për organizimin e një ngjarjeje të rëndësishme sportive ndërkombëtare.