Gjumi i mirë është një nga shtyllat e shëndetit, ndërsa ushqimet që konsumojmë në mbrëmje mund të ndikojnë në mënyrën se si organizmi përgatitet për pushim. Sipas nutricionistes Martina Donegani, një alternativë e thjeshtë për personat që ndiejnë uri para se të shkojnë në shtrat është tërshëra.
Tërshëra përmban triptofan, një aminoacid që organizmi e përdor në proceset e prodhimit të serotoninës dhe më pas melatoninës, hormon që luan rol të rëndësishëm në rregullimin e ciklit gjumë-zgjim. Ajo përmban gjithashtu karbohidrate komplekse dhe fibra, veçanërisht beta-glukane, të cilat ndihmojnë në ruajtjen e ndjenjës së ngopjes dhe në çlirimin gradual të energjisë.
“Mund të jetë një alternativë e mirë për njerëzit që kanë uri para gjumit, për ata që hanë darkë herët ose konsumojnë një vakt të lehtë, por edhe për personat që ushtrohen në mbrëmje dhe kanë nevojë për diçka për rikuperimin e muskujve”, shpjegon Donegani për Vogue.
Nutricionistja sugjeron kombinimin e tërshërës me një burim proteinash, si qumështi ose kosi natyral, për të krijuar një vakt më të balancuar. Në vend të sheqerit të shtuar mund të përdoren fruta të freskëta, ndërsa mund të shtohen edhe kanellë, kakao pa sheqer, arra ose fara. Megjithatë, tërshëra para gjumit nuk është e përshtatshme në të njëjtën mënyrë për të gjithë.
Personat që ndjekin një dietë me pak kalori duhet të marrin parasysh energjinë shtesë të vaktit, ndërsa ata me diabet ose rezistencë ndaj insulinës duhet të kontrollojnë porcionin dhe të shmangin sheqernat e shtuara. Edhe personat që vuajnë nga refluksi gastrik mund të mos e tolerojnë mirë ushqimin menjëherë përpara gjumit.
Donegani thekson se edhe një sasi e vogël çokollate e zezë mund të shtohet, por pa e tepruar. Në çdo rast, tërshëra nuk është një trajtim për pagjumësinë. Ajo mund të jetë thjesht pjesë e një rutine të ekuilibruar në mbrëmje, së bashku me një dietë të përshtatshme dhe zakone të rregullta gjumi.